وفاقی وزیر داخلہ کی اقوام متحدہ سیکرٹری جنرل سے اہم ملاقات
نیویارک (اے پی پی)۔ وفاقی وزیر داخلہ محسن نقوی نے اقوام متحدہ کے ہیڈ کوارٹرز میں اقوام متحدہ کے سیکرٹری جنرل انتونیو گوتریس سے اہم ملاقات کی، جس میں علاقائی صورتحال اور بین الاقوامی امور پر تفصیلی تبادلہ خیال کیا گیا۔ ملاقات کے دوران مغربی ایشیا میں تنازعات کے خاتمے کے لیے پاکستان کی ثالثی کی کوششوں اور اقوام متحدہ کے قیام امن خصوصاً پاکستان کی لازوال خدمات کو اجاگر کیا گیا۔
ترجمان وزارت داخلہ کے مطابق، سیکرٹری جنرل اقوام متحدہ نے عالمی امن کے لیے پاکستان کی کاوشوں کو سراہا۔ اس موقع پر وفاقی وزیر داخلہ محسن نقوی نے اپنے خیالات کا اظہار کرتے ہوئے کہا کہ موجودہ چیلنجز کے باوجود، وزیراعظم پاکستان شہباز شریف اور فیلڈ مارشل سید عاصم منیر نے علاقائی امن و استحکام کو فروغ دینے اور انسانی جانوں کے تحفظ کے لیے ذمہ داری سے اپنا کردار ادا کیا ہے۔
وزیر داخلہ نے مزید کہا کہ اقوام متحدہ کے تمام امن مشنز کی کامیابی کے لیے حقیقت پسندانہ مینڈیٹ اور درکار وسائل کی فراہمی انتہائی ضروری ہے۔ سیکرٹری جنرل اقوام متحدہ نے عالمی امن اور سلامتی کو برقرار رکھنے کے مقصد کے حصول کے لیے اقوام متحدہ کے قیام امن مشنز میں پاکستان کے طویل المدتی اور مثالی تعاون پر پاکستان کا شکریہ ادا کیا۔
