مظفرآباد ہیلی کاپٹر حادثہ: شہداء کی نماز جنازہ، وزیراعظم اور آرمی چیف کی شرکت

راولپنڈی (اے پی پی): مظفرآباد میں گزشتہ روز پیش آنے والے افسوسناک ایم آئی-17 ہیلی کاپٹر حادثے کے شہداء کی نماز جنازہ چکلالہ گیریژن راولپنڈی میں ادا کر دی گئی۔ نماز جنازہ میں وزیراعظم محمد شہباز شریف، آرمی چیف و چیف آف ڈیفنس فورسز فیلڈ مارشل سید عاصم منیر نشان امتیاز (ملٹری) سمیت اعلیٰ سول و عسکری حکام نے شرکت کی۔

شرکاء اور اہم شخصیات

نماز جنازہ میں نائب وزیراعظم و وزیر خارجہ سینیٹر محمد اسحاق ڈار، وزیر دفاع خواجہ محمد آصف، وزیر اطلاعات ونشریات عطاء اللہ تارڑ، شہداء کے اہل خانہ اور معاشرے کے مختلف طبقات سے تعلق رکھنے والے افراد بھی شامل تھے۔ اس سے قبل دو مسیحی شہید فوجیوں کی آخری رسومات راولپنڈی کے کرائسٹ چرچ میں ادا کی گئیں جن میں سیاسی و عسکری قیادت نے بھی شرکت کی۔

وزیراعظم کا شہداء کو خراج تحسین

اس موقع پر گفتگو کرتے ہوئے وزیراعظم شہباز شریف نے شہداء کی فرض شناسی، پیشہ ورانہ مہارت اور مادر وطن کے دفاع کے لیے ان کی غیر متزلزل وابستگی کو خراج تحسین پیش کیا۔ انہوں نے کہا کہ شہداء کی یہ قربانیاں آنے والی نسلوں کے لیے ہمیشہ مشعل راہ رہیں گی۔ وزیراعظم نے زور دیا کہ پاکستان کی مسلح افواج کی جانب سے امن، سلامتی اور قومی خودمختاری کے لیے دی جانے والی قربانیاں کبھی فراموش نہیں کی جا سکتیں۔ انہوں نے اس مشکل گھڑی میں شہداء کے اہل خانہ کے ساتھ قوم کی مکمل یکجہتی اور حمایت کا اعادہ بھی کیا۔

تدفین

شہداء کو مکمل فوجی اعزاز کے ساتھ ان کے آبائی علاقوں میں سپرد خاک کیا جائے گا۔

مزید پڑھیں