وزیراعظم کی ہدایت پر خیبرپختونخوا کو گندم فراہم کرنے کا فیصلہ
نمائندہ خصوصی
اسلام آباد: وزیراعظم شہباز شریف کی ہدایت پر وزارتِ قومی تحفظِ خوراک و تحقیق نے خیبرپختونخوا کو گندم کی فراہمی کا فیصلہ کیا ہے۔ اس سلسلے میں وزارتِ فوڈ سیکیورٹی کو پاکستان ایگریکلچرل اسٹوریج اینڈ سروسز کارپوریشن، پاسکو، کے ذریعے فوری گندم سپلائی کے احکامات جاری کر دیے گئے ہیں۔
وفاقی وزیر برائے قومی تحفظِ خوراک و تحقیق رانا تنویر حسین نے بدھ کو جاری بیان میں کہا کہ وزیراعظم شہباز شریف کے اس اقدام کا مقصد خیبرپختونخوا کے عوام کو مہنگائی کے اثرات سے تحفظ فراہم کرنا اور صوبے میں گندم کی دستیابی کو یقینی بنانا ہے۔
انہوں نے کہا کہ پاسکو کو ہدایت جاری کر دی گئی ہے کہ گندم کی فوری اور موثر سپلائی یقینی بنائی جائے تاکہ عوام کو کسی قسم کی مشکلات کا سامنا نہ کرنا پڑے۔
رانا تنویر حسین کے مطابق وزیراعظم کا یہ اقدام غذائی تحفظ کو مضبوط بنانے اور عوام کو ریلیف فراہم کرنے کے لیے ایک عملی قدم ہے، جس سے صوبے میں آٹے اور گندم کی قیمتوں میں استحکام لانے میں مدد ملے گی۔
حکومت کے اس فیصلے کو ملک میں غذائی تحفظ اور زرعی اجناس کی دستیابی کے حوالے سے اہم پیش رفت قرار دیا جا رہا ہے۔ مزید متعلقہ خبریں زراعت کے صفحے پر پڑھی جا سکتی ہیں۔
