وزیراعظم سے ارکان قومی اسمبلی کی ملاقاتیں، حکومتی ایجنڈے کی تکمیل کا عزم
اسلام آباد (اے پی پی)۔ وزیراعظم محمد شہباز شریف سے ارکان قومی اسمبلی نے پیر کو یہاں علیحدہ علیحدہ ملاقاتیں کیں جن میں ملکی سیاسی صورتحال اور متعلقہ حلقوں کے امور پر تبادلہ خیال کیا گیا۔
وزیراعظم آفس کے میڈیا ونگ کی جانب سے جاری بیان کے مطابق، ملاقات کرنے والوں میں اراکین قومی اسمبلی آغا رفیع اللہ، اعجاز حسین جاکھرانی، ذوالفقار بھنڈر، علی جان مزاری اور ثمر ہارون بلور شامل تھے۔
ملکی ترقی اور خوشحالی کے ایجنڈے پر تبادلہ خیال
ملاقاتوں کے دوران ارکان قومی اسمبلی نے عالمی سطح پر امن کے قیام کے لیے وزیراعظم کی کامیاب کوششوں کو سراہتے ہوئے انہیں خراج تحسین پیش کیا۔ انہوں نے کہا کہ وزیراعظم کی قیادت میں سبز ہلالی پرچم کو تاریخی عزت ملی ہے اور پاکستان کا نام اقوام عالم میں بلند ہوا ہے۔
وزیراعظم محمد شہباز شریف نے ارکان قومی اسمبلی کے جذبات کا خیر مقدم کیا۔ ارکانِ اسمبلی نے اس عزم کا اعادہ کیا کہ وہ قومی مفادات کے تحفظ اور ملک کی ترقی و خوشحالی کے ایجنڈے کی تکمیل کے لیے وزیراعظم کی قیادت میں اپنا بھرپور کردار ادا کرتے رہیں گے۔
ان ملاقاتوں میں وفاقی وزیر برائے امور عامہ یونٹ رانا مبشر اقبال اور معاون خصوصی طلحہ برکی بھی شریک تھے۔
