حج 2027: سرکاری اسکیم کی درخواستیں 18 اگست سے، حبیب بینک واحد بینک مقرر
حج 2027: سرکاری اسکیم کی درخواستیں 18 اگست سے، حبیب بینک واحد بینک مقرر
اسلام آباد، 17 اگست: حج 2027 کے لیے سرکاری حج اسکیم کی درخواستوں کی وصولی 17 اگست کے بجائے 18 اگست 2026 سے شروع ہوگی۔ درخواستیں پہلے آئیے، پہلے پائیے کی بنیاد پر وصول کی جائیں گی اور سرکاری حج اسکیم کا مقررہ کوٹہ مکمل ہونے کے بعد مزید درخواستیں قبول نہیں کی جائیں گی۔
وزارتِ مذہبی امور و بین المذاہب ہم آہنگی کی جانب سے حج 2027 کے لیے درخواستوں اور حج اخراجات کی پہلی و دوسری قسط سے متعلق اشتہار بھی جاری کیا گیا ہے جبکہ حج درخواستوں کے لیے آن لائن نظام فعال ہے۔
ذرائع کے مطابق حج 2027 کے لیے درخواستیں اور واجبات حبیب بینک لمیٹڈ کی منتخب شاخوں کے علاوہ آن لائن نظام کے ذریعے جمع کرائے جا سکیں گے۔ اس مقصد کے لیے وزارت نے سنگل بینک ماڈل اختیار کرتے ہوئے حبیب بینک کو منتخب کیا ہے، جبکہ دیگر بینکوں کو سرکاری حج اسکیم کی درخواستیں اور واجبات وصول کرنے کے عمل میں شامل نہیں کیا گیا۔
پاکستان کے لیے حج 2027 کا مجموعی کوٹہ ایک لاکھ 79 ہزار 210 عازمین مقرر کیا گیا ہے، جس میں 60 فیصد یعنی ایک لاکھ 7 ہزار 526 نشستیں سرکاری حج اسکیم اور 40 فیصد یعنی 71 ہزار 684 نشستیں نجی حج اسکیم کے لیے مختص ہیں۔
وزارت کے مطابق سرکاری حج اسکیم کے لیے پہلے سے رجسٹرڈ عازمین ہی باقاعدہ درخواست کے مرحلے میں شامل ہوں گے۔ حج 2027 کے لیے پیشگی رجسٹریشن جون 2026 میں شروع کی گئی تھی، جس کا مقصد آئندہ حج سیزن کے لیے عازمین کا ڈیٹا اور ترجیحی فہرست مرتب کرنا تھا۔
حج اخراجات دو مساوی اقساط میں وصول کیے جائیں گے۔ درخواست جمع کراتے وقت کل حج پیکیج کی نصف رقم پہلی قسط کے طور پر ادا کرنا ہوگی جبکہ باقی رقم دوسری قسط میں جمع کرائی جائے گی۔
حکومت نے سرکاری حج اسکیم کے تحت 40 روزہ پیکیج کی لاگت 12 لاکھ روپے جبکہ مختصر 20 سے 25 روزہ پیکیج کی لاگت 13 لاکھ روپے مقرر کی ہے۔
حج 2027 کے درخواست اور ادائیگی کے عمل کو بڑی حد تک ڈیجیٹل بنایا گیا ہے۔ عازمین آن لائن درخواستیں جمع کرانے کے ساتھ ون لنک، پی ایس آئی ڈی، کریڈٹ کارڈ اور آن لائن چالان سمیت مختلف ذرائع سے حج اخراجات ادا کرسکیں گے۔ بیرون ملک مقیم پاکستانیوں کو بھی آن لائن درخواست اور ادائیگی کی سہولت فراہم کی گئی ہے۔
وزارتِ مذہبی امور نے حج 2027 کے لیے پاک حج مینجمنٹ سسٹم بھی فعال کردیا ہے، جہاں عازمین کو رجسٹریشن اور درخواست سے متعلق سہولیات دستیاب ہوں گی۔
حکام کے مطابق درخواستوں کی وصولی پہلے آئیے، پہلے پائیے کی بنیاد پر ہوگی اور سرکاری حج اسکیم کا مقررہ کوٹہ مکمل ہوتے ہی درخواستوں کی وصولی روک دی جائے گی۔
وزارتِ مذہبی امور نے عازمین کو ہدایت کی ہے کہ حج 2027 سے متعلق درخواست، ادائیگی اور دیگر معلومات کے لیے وزارت کے سرکاری پلیٹ فارمز اور مجاز ذرائع سے رجوع کریں اور غیر مصدقہ اشتہارات یا سوشل میڈیا پر گردش کرنے والی معلومات سے محتاط رہیں۔
