یوم آزادی کے موقع پر پی سی بی کی پروقار تقریب، قذافی اسٹیڈیم لاہور میں پرچم کشائی
یوم آزادی کے موقع پر پی سی بی کی پروقار تقریب، قذافی اسٹیڈیم لاہور میں پرچم کشائی
لاہور: یوم آزادی کے موقع پر پاکستان کرکٹ بورڈ کی جانب سے قذافی اسٹیڈیم لاہور میں پروقار تقریب کا انعقاد کیا گیا، جس میں پی سی بی کے افسران، اسٹاف اور ان کے اہل خانہ نے شرکت کی۔
تقریب کے دوران پاکستان کرکٹ بورڈ کے چیف آپریٹنگ آفیسر سمیر احمد سید نے قومی پرچم لہرایا اور پرچم کشائی کی۔ اس موقع پر قومی ترانے کی دھن بجائی گئی اور شرکاء نے قومی جذبے کے ساتھ یوم آزادی کی خوشیاں منائیں۔
پرچم کشائی کے بعد یوم آزادی کی مناسبت سے کیک بھی کاٹا گیا۔ چیف آپریٹنگ آفیسر سمیر احمد سید نے پی سی بی کے افسران اور اسٹاف کے ہمراہ کیک کاٹا، جبکہ تقریب میں شریک ملازمین اور ان کے اہل خانہ نے بھی جشن آزادی میں بھرپور شرکت کی۔
قذافی اسٹیڈیم لاہور میں منعقدہ تقریب کے دوران قومی یکجہتی، حب الوطنی اور پاکستان کی ترقی و خوشحالی کے عزم کا اظہار کیا گیا۔ پی سی بی کے اسٹاف اور ان کے اہل خانہ نے قومی پرچم تھام کر یوم آزادی کی خوشیوں میں شرکت کی اور وطن عزیز سے اپنی محبت کا اظہار کیا۔
اس موقع پر پاکستان کرکٹ بورڈ کی جانب سے پوری قوم کو یوم آزادی کی دلی مبارکباد پیش کی گئی۔ پی سی بی نے نیک خواہشات کا اظہار کرتے ہوئے کہا کہ پاکستان ہمیشہ ترقی، خوشحالی اور استحکام کی جانب گامزن رہے اور قومی کرکٹ ملک کا نام دنیا بھر میں روشن کرتی رہے۔
تقریب کے اختتام پر پاکستان کی سلامتی، ترقی، خوشحالی اور استحکام کے لیے خصوصی دعائیں بھی کی گئیں۔ تقریب نے پی سی بی کے ملازمین اور ان کے اہل خانہ کو یوم آزادی کے موقع پر ایک ساتھ مل کر قومی دن کی خوشیاں منانے کا موقع فراہم کیا۔
