میزان بینک آئندہ سال شریعہ کمپلائنٹ کریڈٹ کارڈ متعارف کرائے گا
میزان بینک آئندہ سال شریعہ کمپلائنٹ کریڈٹ کارڈ متعارف کرائے گا
کراچی: میزان بینک لمیٹڈ نے 2027 میں کریڈٹ کارڈ کے شعبے میں باضابطہ طور پر داخل ہونے کی تیاری شروع کردی ہے، جس کے تحت دو شریعہ کمپلائنٹ کارڈ مصنوعات متعارف کرانے کا منصوبہ ہے۔
میزان بینک کی دوسری سہ ماہی 2026 کی کارپوریٹ بریفنگ کے دوران انتظامیہ نے بتایا کہ مجوزہ مصنوعات میں میزان چارج کارڈ اور میزان اسلامک فنانسنگ کارڈ شامل ہیں۔ دونوں مصنوعات کی تیاری بینک کی فجیٹل حکمت عملی، ڈیجیٹل بینکاری کے فروغ اور برانچ نیٹ ورک میں توسیع کے منصوبے کا حصہ ہے۔
انتظامیہ کے مطابق میزان چارج کارڈ روایتی کریڈٹ کارڈ سے مختلف ہوگا، جس میں صارف کو ہر ماہ کے اختتام پر مکمل بقایا رقم ادا کرنا ہوگی اور اس پر سود عائد نہیں کیا جائے گا۔
دوسری جانب میزان اسلامک فنانسنگ کارڈ ایک مرتبہ کی فنانسنگ سہولت پر مبنی ہوگا، جسے ڈپازٹ ڈرا ڈاؤن اسٹرکچر سے منسلک کیا جائے گا۔ میزان چارج کارڈ کی اندرونی سطح پر ملازمین کے ذریعے آزمائش جاری ہے، جبکہ اسلامک فنانسنگ کارڈ کی اسٹاف ٹرائلنگ آئندہ چند سہ ماہیوں میں شروع ہونے کی توقع ہے۔ دونوں مصنوعات کی عوامی سطح پر لانچ 2027 میں متوقع ہے۔
میزان بینک نے اپنے برانچ نیٹ ورک کو بھی مزید وسعت دینے کا فیصلہ کیا ہے۔ بینک رواں سال کے اختتام تک مزید 100 برانچز کھولنے کا منصوبہ رکھتا ہے، جس کے بعد ملک بھر میں اس کی برانچز کی تعداد 1250 تک پہنچ جائے گی۔ 2026 کی پہلی ششماہی کے دوران بینک پہلے ہی 45 نئی برانچز کھول چکا ہے۔
بینک انتظامیہ نے بتایا کہ ادارہ ڈیجیٹل بینکاری کے ساتھ فزیکل برانچ نیٹ ورک کو بھی اہمیت دے رہا ہے، کیونکہ برانچز ڈپازٹس کے حصول اور سیلز آپریشنز میں اہم کردار ادا کرتی ہیں۔ اس کے علاوہ چھوٹے اور درمیانے درجے کے کاروباری اداروں کو فنانسنگ فراہم کرنے پر بھی توجہ بڑھائی جا رہی ہے۔
مالیاتی کارکردگی کے حوالے سے میزان بینک کا 2026 کی پہلی ششماہی کا مجموعی خالص منافع 48.9 ارب روپے رہا، جو گزشتہ سال کی اسی مدت کے 46.1 ارب روپے کے مقابلے میں 6 فیصد زیادہ ہے۔ بینک کی فی شیئر آمدن 27.15 روپے رہی جبکہ بورڈ نے دوسری سہ ماہی کے لیے 8 روپے فی شیئر عبوری نقد منافع کا اعلان کیا۔
دورانِ مدت میزان بینک کے مجموعی اثاثے 5 کھرب روپے سے تجاوز کر گئے، جبکہ ڈپازٹس 13 فیصد اضافے کے ساتھ 3.7 کھرب روپے تک پہنچ گئے۔ بینک کا کرنٹ اور سیونگ اکاؤنٹس کا تناسب 91 فیصد رہا۔
