ایف پی سی سی آئی کا کیش لیس معیشت کے فروغ کیلئے راؤنڈ ٹیبل
کراچی (نمائندہ خصوصی)۔ فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے صدر عاطف اکرام شیخ نے کہا ہے کہ پاکستان کی معاشی ترقی کا انحصار اب ڈیجیٹل نظام کی طرف منتقلی میں مضمر ہے۔ انہوں نے ان خیالات کا اظہار فیڈریشن ہاؤس کراچی میں منعقدہ ایک اعلیٰ سطحی راؤنڈ ٹیبل سیشن کے دوران کیا، جس کا مقصد پاکستان میں کیش لیس معیشت کے فروغ کے لیے عملی اقدامات کا تعین کرنا تھا۔
کیش لیس معیشت وقت کی اہم ضرورت
صدر ایف پی سی سی آئی عاطف اکرام شیخ نے اجلاس سے خطاب کرتے ہوئے کہا کہ آج کا سیشن وفاقی و صوبائی حکومتی اداروں اور نجی شعبے کے مابین ایک اہم پیشرفت ہے۔ اجلاس میں اسٹیٹ بینک آف پاکستان (SBP)، فیڈرل بورڈ آف ریونیو (FBR) اور سندھ ریونیو بورڈ (SRB) کے اعلیٰ حکام نے شرکت کی۔ عاطف اکرام شیخ نے کہا کہ کیش لیس معیشت اب کوئی اختیاری معاملہ نہیں رہا بلکہ یہ معاشی شفافیت، کاروباری لاگت میں کمی اور عالمی مارکیٹوں سے روابط کے لیے ایک لازمی تقاضا ہے۔
ڈیجیٹل ادائیگیوں کے فروغ کیلئے مراعات
اس اہم اجلاس کا بنیادی مقصد ڈیجیٹل ادائیگیوں کے لیے مربوط مراعات وضع کرنا تھا۔ شرکاء نے ٹیکس ریلیف، کیش بیک اور مختلف رعایتوں جیسے موضوعات پر تبادلہ خیال کیا تاکہ دستاویزی لین دین کو ترجیح دی جا سکے۔ اسٹیٹ بینک کے فنانشل انکلوژن سپورٹ ڈپارٹمنٹ (ایف آئی ایس ڈی) کے سربراہ غلام محمد پھل نے کہا کہ اسٹیٹ بینک ایک مضبوط ڈیجیٹل انفراسٹرکچر کی فراہمی کے لیے کوشاں ہے اور فن ٹیک کمپنیوں کے ذریعے سستے ڈیجیٹل حل کی حمایت کرتا ہے۔ ایف بی آر اور ریونیو حکام کا مؤقف ایف بی آر کے چیف کمشنر، آر ٹی او، ظفررفیق نے کہا کہ ٹیکس نیٹ کو وسیع کرنے کے لیے ڈیجیٹلائزیشن کلیدی حیثیت رکھتی ہے اور اس ضمن میں ٹیکس مراعات کا جائزہ لیا جا رہا ہے۔ جبکہ آئی آر حیدرآباد کے چیف کمشنر سجاد اکبر نے یقین دلایا کہ تاجر برادری کی تجاویز کو پالیسی سازی میں شامل کیا جائے گا۔ سندھ ریونیو بورڈ کے سینئر ممبر عبدالحمید میمن نے بتایا کہ سندھ حکومت پہلے ہی ریستورانوں میں ڈیجیٹل ادائیگی پر سیلز ٹیکس کی شرح 8 فیصد کر کے اس عمل کو فروغ دے رہی ہے۔
کاروباری برادری کا مطالبہ
ایف پی سی سی آئی کے سینئر نائب صدر ثاقب فیاض مگوں نے کہا کہ نجی شعبے اور ریگولیٹرز کو باہمی تعاون بڑھانا ہوگا۔ انہوں نے اس بات پر زور دیا کہ ڈیجیٹلائزیشن کے نام پر پہلے سے ٹیکس دینے والے طبقے پر مزید بوجھ نہ ڈالا جائے بلکہ مراعات کے ذریعے ٹیکس نیٹ بڑھایا جائے۔ ایف پی سی سی آئی کے پالیسی ایڈوائزری بورڈ کے چیئرمین میاں زاہد حسین نے بھی اس رائے کا اعادہ کیا کہ مخصوص ٹیکس ریلیف ہی معیشت کو دستاویزی بنانے کا واحد پائیدار راستہ ہے۔
