چین کی گوانگ ڈونگ ریجنل مینز ہاکی ٹیم 12 سے 30 اکتوبر تک پاکستان کا دورہ کرے گی
چین کی گوانگ ڈونگ ریجنل مینز ہاکی ٹیم 12 سے 30 اکتوبر تک پاکستان کا دورہ کرے گی
اسلام آباد: پاکستان ہاکی فیڈریشن نے اعلان کیا ہے کہ چین کی گوانگ ڈونگ ریجنل مینز ہاکی ٹیم 12 سے 30 اکتوبر 2026ء تک پاکستان کا تفصیلی دورہ کرے گی، اس دوران چینی ٹیم ملک کے مختلف بڑے ہاکی مراکز میں پاکستانی محکمانہ، ادارہ جاتی اور کلب ٹیموں کے خلاف متعدد مسابقتی میچز کھیلے گی۔
پاکستان ہاکی فیڈریشن کے مطابق چینی ریجنل ٹیم کا دورہ پاکستان اور چین کے درمیان ہاکی تعلقات کو مزید مضبوط بنانے، پاکستانی کھلاڑیوں کو مسلسل بین الاقوامی معیار کی مسابقت فراہم کرنے اور دونوں ممالک کے درمیان کھیلوں کے تبادلوں کو فروغ دینے کی کوششوں کا حصہ ہے۔ گوانگ ڈونگ ٹیم کا وفد 12 اکتوبر کو پاکستان پہنچے گا اور 30 اکتوبر کو وطن واپس روانہ ہوگا۔
دورے کے دوران 14 اکتوبر کو ایم پی سی ایل ہاکی اسٹیڈیم راولپنڈی میں ایم پی سی ایل اور گوانگ ڈونگ کے درمیان میچ کھیلا جائے گا، 15 اکتوبر کو نصیر بندہ ہاکی اسٹیڈیم اسلام آباد میں پاک ڈی ایس اور گوانگ ڈونگ، 17 اکتوبر کو اسی اسٹیڈیم میں پاکستان نیوی اور گوانگ ڈونگ جبکہ 18 اکتوبر کو واہ کینٹ ہاکی اسٹیڈیم میں پاک ڈی ایس اور گوانگ ڈونگ مدمقابل ہوں گے۔
اسی طرح 20 اکتوبر کو نصیر بندہ ہاکی اسٹیڈیم اسلام آباد میں پاک ڈی ایس اور گوانگ ڈونگ کے درمیان میچ ہوگا، 23 اکتوبر کو ڈی ایچ اے ہاکی اسٹیڈیم لاہور میں پاکستان کسٹمز اور گوانگ ڈونگ، 24 اکتوبر کو اسپورٹس کمپلیکس نارووال میں پاک ڈی ایس اور گوانگ ڈونگ جبکہ 26 اکتوبر کو نیشنل ہاکی اسٹیڈیم گوجرہ میں پاک ڈی ایس اور گوانگ ڈونگ کے درمیان مقابلہ ہوگا۔
27 اکتوبر کو ڈی ایچ اے ہاکی اسٹیڈیم لاہور میں پاک ڈی ایس اور گوانگ ڈونگ ایک بار پھر آمنے سامنے ہوں گے، جبکہ 29 اکتوبر کو ایک اضافی میچ بھی مجوزہ ہے جس کا حتمی فیصلہ ہونا باقی ہے اور مقام بعد میں طے کیا جائے گا۔
پی ایچ ایف کے مطابق طویل دورے سے گوانگ ڈونگ ریجنل ٹیم کو بین الاقوامی کھیلوں کا تجربہ حاصل ہوگا جبکہ پاکستانی ٹیموں کو ملک کے مختلف علاقوں میں ایک مضبوط چینی ٹیم کے خلاف کھیلنے کا موقع ملے گا۔
پاکستان ہاکی فیڈریشن نے دورے کو دونوں ممالک کے درمیان ہاکی تعاون کو وسعت دینے، باقاعدہ بین الاقوامی روابط کو فروغ دینے اور کھلاڑیوں، کوچز اور آفیشلز کے لیے مزید مواقع پیدا کرنے کی جانب اہم قدم قرار دیا ہے۔
فیڈریشن کے مطابق چینی ٹیم کے دورہ پاکستان سے ملک میں ہاکی کے فروغ میں بھی مدد ملے گی اور بین الاقوامی مقابلوں کا دائرہ اسلام آباد اور لاہور سے بڑھا کر راولپنڈی، واہ کینٹ، نارووال اور گوجرہ جیسے اہم ہاکی مراکز تک وسیع ہوگا۔
پی ایچ ایف کے مطابق چینی وفد، میچز کے اوقات کار اور 29 اکتوبر کے مجوزہ اضافی میچ سے متعلق مزید تفصیلات مناسب وقت پر جاری کی جائیں گی۔
