ہاکی ورلڈ کپ: پاکستان کو افتتاحی میچ میں انگلینڈ کے ہاتھوں 4-1 سے شکست
ہاکی ورلڈ کپ: پاکستان کو افتتاحی میچ میں انگلینڈ کے ہاتھوں 4-1 سے شکست
ایمسٹل وین: ایف آئی ایچ ورلڈ کپ کے پول ڈی کے افتتاحی میچ میں پاکستان کو انگلینڈ کے ہاتھوں 4-1 سے شکست کا سامنا کرنا پڑا، انگلش ٹیم نے نیدرلینڈز کے شہر ایمسٹل وین کے ویگنر ہاکی اسٹیڈیم میں میچ کے بیشتر حصے میں اپنی برتری برقرار رکھی۔
انگلینڈ نے ابتدا ہی سے جارحانہ کھیل کا مظاہرہ کیا اور چاروں کوارٹرز میں پاکستان پر دباؤ قائم رکھا۔ انگلینڈ کی مسلسل حملہ آور حکمت عملی کے نتیجے میں اسے چار گول ملے جبکہ پاکستان کی ٹیم صرف ایک گول کرنے میں کامیاب رہی۔
2018 کے بعد پہلی مرتبہ ورلڈ کپ میں شرکت کرنے والی پاکستانی ٹیم کی دفاعی لائن کو انگلینڈ کے مسلسل حملوں کا سامنا کرنا پڑا اور انگلینڈ نے متعدد پنالٹی کارنرز حاصل کیے۔ پاکستان نے بھی مواقع پیدا کیے اور اسے دو پنالٹی کارنرز ملے تاہم دونوں کو گول میں تبدیل نہ کیا جا سکا۔
انگلینڈ کی جانب سے اسٹورٹ رشمیئر نے 12ویں منٹ میں گول کرکے ٹیم کو برتری دلائی، جبکہ دوسرے کوارٹر میں سیم وارڈ نے انگلینڈ کی برتری دگنی کردی۔
سیموئل ہوپر نے 31ویں منٹ میں انگلینڈ کی جانب سے تیسرا گول کیا، جس کے بعد پاکستان پر دباؤ مزید بڑھ گیا۔ انگلینڈ کے جیمز البری نے 47ویں منٹ میں چوتھا گول کرکے اپنی ٹیم کی برتری مزید مستحکم کردی۔
پاکستان کی جانب سے رحمان عبدالفراز نے 50ویں منٹ میں گول کرکے خسارہ کم کیا اور گرین شرٹس میں کم بیک کی امید پیدا ہوئی، تاہم پاکستان مزید گول نہ کر سکا اور انگلینڈ نے 1-4 سے کامیابی حاصل کرلی۔
پاکستان نے 2018 کے بعد پہلی بار ورلڈ کپ میں جگہ بنائی ہے، جبکہ ٹیم 2023 کے ایڈیشن کے لیے کوالیفائی نہیں کر سکی تھی۔
پاکستان اپنا اگلا میچ 17 اگست کو ویلز کے خلاف کھیلے گا، جبکہ 19 اگست کو روایتی حریف بھارت کے مدمقابل ہوگا۔
