صدر نے فوجی و سول اعزازات اور قیدیوں کی سزا میں 100 روزہ خصوصی معافی کی منظوری دے دی
صدر نے فوجی و سول اعزازات اور قیدیوں کی سزا میں 100 روزہ خصوصی معافی کی منظوری دے دی
اسلام آباد، 14 اگست: صدر مملکت آصف علی زرداری نے وزیراعظم کی جانب سے بھجوائی گئی متعدد سمریوں کی منظوری دے دی، جن میں مسلح افواج اور سول آرمڈ فورسز کے اہلکاروں کے لیے فوجی اعزازات، مختلف شعبوں میں نمایاں خدمات انجام دینے والے شہریوں کے لیے سول اعزازات اور اہل قیدیوں کی سزاؤں میں 100 روزہ خصوصی معافی شامل ہے۔
صدر مملکت کی میڈیا ونگ کے مطابق صدر آصف علی زرداری نے مسلح افواج اور سول آرمڈ فورسز کے 1,172 اہلکاروں کو ان کی خدمات کے اعتراف میں فوجی اعزازات دینے کی منظوری دی۔
صدر مملکت نے 17 اگست کو قومی اسمبلی کا اجلاس شام 5 بجے طلب کرنے کی بھی منظوری دی، جبکہ اسی روز سینیٹ کا اجلاس شام 4 بجے ہوگا۔
یوم آزادی اور عید میلاد النبی ﷺ کے موقع پر صدر مملکت نے اہل قیدیوں کی سزاؤں میں 100 روز کی خصوصی معافی کی منظوری بھی دی۔
اس کے علاوہ صدر آصف علی زرداری نے مختلف شعبہ ہائے زندگی میں نمایاں خدمات انجام دینے والے شہریوں کو قومی سول اعزازات دینے کی منظوری دی۔
قومی سول اعزازات مختلف شعبوں میں ملک و قوم کے لیے نمایاں خدمات انجام دینے والی شخصیات کی خدمات کے اعتراف میں دیے جائیں گے۔
