اسلام آباد کا شہید ملت سیکریٹریٹ فائیو اسٹار ہوٹل میں تبدیل کرنے کی تجویز، وزیراعظم نے کمیٹی قائم کردی
اسلام آباد کا شہید ملت سیکریٹریٹ فائیو اسٹار ہوٹل میں تبدیل کرنے کی تجویز، وزیراعظم نے کمیٹی قائم کردی
اسلام آباد: وفاقی حکومت نے دارالحکومت میں غیر ملکی مہمانوں کے لیے اعلیٰ معیار کی رہائش کی گنجائش بڑھانے کے لیے شہید ملت سیکریٹریٹ کو لگژری فائیو اسٹار ہوٹل میں تبدیل کرنے کی تجویز پر غور شروع کردیا ہے، جبکہ وزیراعظم شہباز شریف نے منصوبے کی فزیبلٹی جانچنے کے لیے اعلیٰ سطح کی کمیٹی قائم کردی ہے۔
ڈان کے مطابق وزارت ہاؤسنگ اور کیپیٹل ڈویلپمنٹ اتھارٹی (سی ڈی اے) کے ذرائع نے بتایا کہ کمیٹی میں وفاقی وزرائے داخلہ، ہاؤسنگ اور خزانہ سمیت اعلیٰ سرکاری حکام شامل ہیں۔ کمیٹی مجوزہ منصوبے کے تکنیکی، مالی، قانونی اور انتظامی پہلوؤں کا جائزہ لے گی اور اپنی سفارشات وفاقی کابینہ کے سامنے پیش کرے گی۔
یہ تجویز اکتوبر 2027 میں اسلام آباد میں ہونے والے شنگھائی تعاون تنظیم (ایس سی او) کونسل آف ہیڈز آف اسٹیٹ کے اجلاس کے پیش نظر سامنے آئی ہے۔ حکام کے مطابق اجلاس میں تقریباً 35 وی وی آئی پیز جبکہ ان کے ہمراہ آنے والے وفود سمیت 3 ہزار سے زائد غیر ملکی مہمانوں کی آمد متوقع ہے، جس کے لیے دارالحکومت میں اعلیٰ معیار کی اضافی رہائش درکار ہوگی۔
ہوٹل میں تبدیلی کا مجوزہ منصوبہ
ابتدائی تجویز کے مطابق شہید ملت سیکریٹریٹ کی عمارت کو مکمل طور پر مسمار کرکے نئی عمارت تعمیر کرنے کے بجائے موجودہ ڈھانچے کو جدید فائیو اسٹار ہوٹل میں تبدیل کیا جاسکتا ہے۔ ابتدائی تکنیکی جائزے میں عمارت کی تیسری سے سولہویں منزل تک کے حصے کو ہوٹل کے لیے استعمال کرنے کی گنجائش کا جائزہ لیا گیا ہے۔
مجوزہ ڈیزائن کے تحت عمارت میں تقریباً 128 گیسٹ رومز اور 64 لگژری سوئٹس بنائے جاسکتے ہیں۔ اس کے علاوہ بالائی حصوں میں روف ٹاپ ریسٹورنٹ اور پینٹ ہاؤس سمیت اعلیٰ معیار کی دیگر مہمان نوازی کی سہولیات فراہم کرنے کی تجویز بھی زیر غور ہے۔
عمارت کے گراؤنڈ فلور پر پہلے ہی وی آئی پی داخلی راستہ، سیکیورٹی اسکریننگ، بیل ڈیسک، استقبالیہ اور انتظار گاہیں موجود ہیں، جبکہ تقریباً 15 ہزار 170 مربع فٹ پر مشتمل میز نائن فلور کو بھی ہوٹل کی معاون اور سروسز سے متعلق ضروریات کے لیے استعمال کیا جاسکتا ہے۔
ذرائع کے مطابق شہید ملت سیکریٹریٹ کو ہوٹل میں تبدیل کرنے کی تجویز سابق چیئرمین سی ڈی اے سہیل اشرف نے وزیراعظم شہباز شریف کے سامنے پیش کی تھی۔ تجویز کے بعد وزیراعظم نے معاملے کے مختلف پہلوؤں کا جائزہ لینے کے لیے اعلیٰ سطحی کمیٹی تشکیل دی ہے۔
شہید ملت سیکریٹریٹ کا پس منظر
شہید ملت سیکریٹریٹ اسلام آباد کے سیکٹر ایف-6/1 میں پلاٹ نمبر 4 پر واقع ہے۔ عمارت جناح ایونیو، بلیو ایریا اور ناظم الدین روڈ کے درمیان ایک مرکزی مقام پر قائم ہے، جبکہ ریڈ زون اور اہم سرکاری تنصیبات تک بھی اسے نسبتاً آسان رسائی حاصل ہے۔
سرکاری ریکارڈ کے مطابق عمارت تقریباً 4 ہزار 411 مربع گز کے پلاٹ پر قائم ہے۔ یہ اراضی 1975 میں ہاؤس بلڈنگ فنانس کارپوریشن کو الاٹ کی گئی تھی۔ عمارت کا مجموعی کورڈ ایریا تقریباً 2 لاکھ 51 ہزار 774 مربع فٹ ہے، جس میں بیسمنٹ اور متعدد داخلی و خارجی راستے شامل ہیں۔
حکام کے مطابق عمارت کو ہوٹل میں تبدیل کرنے کے لیے اس کے موجودہ ڈھانچے، ساختی مضبوطی اور دستیاب جگہ کا جائزہ لیا جارہا ہے۔ ماضی میں عمارت میں آتش زدگی کا واقعہ بھی پیش آچکا ہے، تاہم وزارت ہاؤسنگ کے ایک اعلیٰ عہدیدار کے مطابق عمارت ساختی طور پر مضبوط اور مناسب استعمال کے لیے موزوں ہے۔
اسلام آباد میں ہوٹل کمروں کی ضرورت
شہید ملت سیکریٹریٹ کو ہوٹل میں تبدیل کرنے کی تجویز ایسے وقت میں سامنے آئی ہے جب اسلام آباد میں بین الاقوامی معیار کی رہائش کی طلب بڑھ رہی ہے۔ حکام کے مطابق ایس سی او سربراہی اجلاس کے علاوہ جنوبی ایشیائی کھیلوں، انٹرنیشنل اولمپک کمیٹی کے اجلاس اور دیگر بین الاقوامی سرگرمیوں کے باعث دارالحکومت میں تقریباً 4 ہزار بین الاقوامی معیار کے ہوٹل کمروں کی ضرورت ہوگی۔
حکام کا کہنا ہے کہ موجودہ گنجائش اس ضرورت کو پورا کرنے کے لیے ناکافی ہے، اس لیے نئے ہوٹلوں کی تعمیر اور موجودہ سرکاری یا دیگر موزوں عمارتوں کو ہوٹلنگ کے لیے استعمال کرنے کے مختلف آپشنز کا جائزہ لیا جارہا ہے۔
شہید ملت سیکریٹریٹ کو فائیو اسٹار ہوٹل میں تبدیل کرنے کا منصوبہ فی الحال حتمی طور پر منظور نہیں ہوا۔ وزیراعظم کی قائم کردہ کمیٹی منصوبے کی فزیبلٹی، لاگت، قانونی حیثیت، تعمیر نو کے تقاضوں اور انتظامی ماڈل کا جائزہ لینے کے بعد اپنی سفارشات پیش کرے گی، جس کے بعد وفاقی حکومت حتمی فیصلہ کرے گی۔
