ٹرمپ کی کرپٹو کرنسی سے ایک ارب ڈالر سے زائد آمدنی، مالیاتی گوشوارے جاری
واشنگٹن: امریکی صدر ڈونلڈ ٹرمپ نے اپنے تازہ مالیاتی گوشوارے جاری کر دئیے ہیں، جن سے ان کی کرپٹو کرنسی سے وابستہ غیر معمولی آمدنی سامنے آئی ہے۔
امریکی آفس آف گورنمنٹ ایتھکس میں جمع کرائے گئے 927 صفحات پر مشتمل مالیاتی انکشافات کے مطابق صدر ٹرمپ نے 2025 کے دوران کرپٹو کرنسی سے متعلق کاروبار سے ایک ارب ڈالر سے زائد آمدنی حاصل کی۔
رپورٹ کے مطابق ٹرمپ کی کمپنی CIC Digital LLC، جو ان کے میم کوائن منصوبے سے وابستہ ہے، نے تقریباً 636 ملین ڈالر کی آمدنی حاصل کی، جس کا بڑا حصہ لائسنسنگ رائلٹیز سے آیا۔ اس کے علاوہ ٹرمپ اور ان کے اہل خانہ سے وابستہ کرپٹو کمپنی World Liberty Financial سے بھی سیکڑوں ملین ڈالر کی آمدنی ظاہر کی گئی ہے۔
مالیاتی دستاویزات کے مطابق کرپٹو اثاثے صدر ٹرمپ کی آمدنی کا سب سے بڑا ذریعہ بن کر سامنے آئے ہیں، جبکہ ان کے گالف ریزورٹس، ہوٹلوں، بین الاقوامی لائسنسنگ معاہدوں اور دیگر کاروباری سرگرمیوں سے بھی کروڑوں ڈالر کی آمدنی ہوئی۔
رپورٹ کے اجرا کے بعد ٹرمپ کے مالی مفادات اور صدارتی منصب کے درمیان ممکنہ مفادات کے ٹکراؤ پر ایک بار پھر بحث شروع ہو گئی ہے۔ تاہم وائٹ ہاؤس کا کہنا ہے کہ صدر ٹرمپ کے تمام فیصلے امریکی عوام کے مفاد میں کیے جاتے ہیں اور ان کے کاروباری معاملات قانون کے مطابق منظم کیے جا رہے ہیں۔
