مردان کے قریب پی اے ایف تربیتی طیارہ تباہ، صدر و وزیراعظم کا اظہارِ افسوس

اسلام آباد (اے پی پی)۔ صدر مملکت آصف علی زرداری اور وزیراعظم محمد شہباز شریف نے پیر کو مردان کے قریب پاکستان ایئر فورس (پی اے ایف) کا تربیتی طیارہ گر کر تباہ ہونے پر گہرے دکھ اور افسوس کا اظہار کیا ہے۔

اپنے علیحدہ علیحدہ بیانات میں صدر مملکت اور وزیراعظم نے المناک حادثے میں شہید ہونے والے فلائٹ لیفٹیننٹ محمد قاسم عبداللہ اور پاکستان نیوی کے لیفٹیننٹ طحہ عباسی کو زبردست خراج عقیدت پیش کیا۔

انہوں نے شہداء کے درجات کی بلندی اور سوگوار خاندانوں کے لیے اس ناقابل تلافی نقصان کو برداشت کرنے کی ہمت کے لیے دعا کی۔

صدر زرداری نے غمزدہ خاندانوں سے دلی ہمدردی کا اظہار کرتے ہوئے کہا کہ قوم اپنے بہادر سپوتوں کی قربانیوں کو ہمیشہ یاد رکھے گی جنہوں نے وطن کے دفاع کے لیے اپنی جانیں قربان کیں۔

وزیراعظم شہباز شریف نے بھی سوگوار خاندانوں سے تعزیت کا اظہار کرتے ہوئے کہا کہ ملک کے دفاع کے لیے پاکستان کی مسلح افواج کی پیشہ ورانہ قابلیت بے مثال ہے۔