وزیراعظم سے ارکان اسمبلی کی ملاقاتیں، عوام دوست بجٹ پر خراج تحسین
اسلام آباد: وزیراعظم محمد شہباز شریف سے منگل کو ارکان قومی اسمبلی نے الگ الگ ملاقاتیں کیں، جن میں ملکی سیاسی صورتحال اور متعلقہ حلقوں کے امور پر تبادلہ خیال کیا گیا۔
وزیر اعظم آفس کے میڈیا ونگ سے جاری بیان کے مطابق، وزیراعظم سے ملاقات کرنے والوں میں میاں عالم داد لالیکا، ارم حامد حمید، شیخ آفتاب احمد، محمد خان ڈاہا، انوار الحق چوہدری، شہباز بابر، سردار شمشیر مزاری اور دانیال احمد شامل تھے۔
ملاقاتوں کے دوران اراکین قومی اسمبلی نے مالی سال 2026-27 کا عوام دوست بجٹ پیش کرنے پر وزیراعظم شہباز شریف کو مبارکباد دی اور انہیں خراج تحسین پیش کیا۔ ارکان نے خطے میں امن و امان کی صورتحال کو بہتر بنانے میں پاکستان کے مؤثر سفارتی کردار کو بھی سراہا۔
ان ملاقاتوں میں اراکین نے اپنے اپنے حلقوں سے متعلق عوامی مسائل اور ترقیاتی امور پر وزیراعظم کو آگاہ کیا۔ اس موقع پر ملک کی مجموعی سیاسی و معاشی صورتحال پر بھی تفصیلی تبادلہ خیال کیا گیا۔
وفاقی وزیر برائے پبلک افیئرز یونٹ رانا مبشر اقبال اور وزیراعظم کے معاون خصوصی طلحہ برکی بھی ان ملاقاتوں میں موجود تھے۔
