محمد خالد
واشنگٹن۔15 اپریل: جے ڈی وینس نے کہا ہے کہ ڈونلڈ ٹرمپ ایران کے ساتھ محدود یا عارضی معاہدے کے بجائے ایک بڑی اور جامع بارگین کے خواہاں ہیں، جو خطے میں دیرپا امن اور استحکام کا باعث بن سکے۔
غیر ملکی میڈیا کے مطابق ایک تقریب سے خطاب کرتے ہوئے جے ڈی وینس نے کہا کہ امریکہ ایران کو واضح پیشکش دے رہا ہے کہ اگر وہ جوہری ہتھیار نہ بنانے کی یقین دہانی کرائے تو امریکہ اس کی معاشی بہتری میں کردار ادا کرے گا۔ ان کا کہنا تھا کہ یہی وہ بڑی ڈیل ہے جس کی طرف امریکی قیادت پیش رفت کر رہی ہے۔
انہوں نے کہا کہ دونوں ممالک کے درمیان مذاکرات جاری ہیں اور کوشش کی جا رہی ہے کہ اس پیشکش کو عملی شکل دی جائے۔ جے ڈی وینس کے مطابق صدر ٹرمپ نے انہیں ہدایت کی تھی کہ پاکستان سمیت خطے میں موجود مواقع کو استعمال کرتے ہوئے ایران کے ساتھ نیک نیتی کے ساتھ بات چیت کو آگے بڑھایا جائے۔
امریکی نائب صدر نے اس بات کا اعتراف بھی کیا کہ امریکہ اور ایران کے درمیان اعتماد کا فقدان ایک بڑا مسئلہ ہے اور یہ خلیج فوری طور پر ختم نہیں ہو سکتی، تاہم انہوں نے حالیہ پیش رفت پر اطمینان کا اظہار کیا۔
ان کا کہنا تھا کہ جنگ بندی کا برقرار رہنا ایک مثبت اشارہ ہے اور دونوں ممالک کے درمیان تعلقات میں بہتری کی امید پیدا ہو رہی ہے۔ انہوں نے کہا کہ اگر مذاکرات کامیاب ہو جاتے ہیں تو یہ نہ صرف خطے بلکہ پوری دنیا کے لیے ایک اہم پیش رفت ہوگی۔
