گلگت بلتستان میں بلدیاتی انتخابات 5 دسمبر کو ہوں گے، انتخابی شیڈول جاری
گلگت بلتستان میں بلدیاتی انتخابات 5 دسمبر کو ہوں گے، انتخابی شیڈول جاری
گلگت: گلگت بلتستان میں بلدیاتی انتخابات کے پہلے مرحلے میں گلگت، اسکردو اور چلاس کی میونسپل کارپوریشنز کی نشستوں پر پولنگ 5 دسمبر 2026 کو ہوگی، جبکہ ضلع کونسلوں، میونسپل کمیٹیوں اور یونین کونسلوں کے انتخابات اپریل 2027 میں منعقد کیے جائیں گے۔
چیف الیکشن کمشنر گلگت بلتستان راجہ شہباز خان نے 15 اکتوبر کو گلگت بلتستان الیکشن کمیشن سیکریٹریٹ میں پریس کانفرنس کرتے ہوئے نظرثانی شدہ انتخابی شیڈول کا اعلان کیا۔ انہوں نے بتایا کہ بلدیاتی انتخابات لوکل گورنمنٹ ایکٹ میں ضروری ترامیم کے بعد منعقد کیے جائیں گے۔
چیف الیکشن کمشنر کے مطابق پہلے مرحلے میں گلگت میونسپل کارپوریشن کی 42، اسکردو کی 21 اور چلاس کی 13 عمومی نشستوں پر براہِ راست ووٹنگ ہوگی۔ ان شہروں میں منتخب نمائندے بعد ازاں اپنے متعلقہ میونسپل کارپوریشنز کے میئر اور ڈپٹی میئر کا انتخاب کریں گے۔
راجہ شہباز خان نے بتایا کہ ترمیم شدہ قانون کے تحت بلدیاتی اداروں کی اقسام سات سے کم کرکے چار کردی گئی ہیں، جن میں ضلع کونسلیں، یونین کونسلیں، میونسپل کمیٹیاں اور میونسپل کارپوریشنز شامل ہیں۔ نئے نظام کے تحت آزاد امیدواروں کو بھی انتخابات میں حصہ لینے کی اجازت ہوگی۔
انہوں نے کہا کہ بلدیاتی اداروں میں خواتین کے لیے 17 فیصد نشستیں مختص کی گئی ہیں۔ اس کے علاوہ خواتین، نوجوانوں، غیر مسلموں اور خصوصی افراد کی نمائندگی کے لیے مخصوص نشستیں بھی رکھی گئی ہیں۔
چیف الیکشن کمشنر کے مطابق باقی اضلاع اور علاقوں میں ضلع کونسلوں، میونسپل کمیٹیوں اور یونین کونسلوں کے انتخابات اپریل 2027 میں ہوں گے۔ ان علاقوں میں انتخابی عمل کے لیے موسم اور برف باری کی صورتحال کو بھی مدنظر رکھا گیا ہے۔
گلگت بلتستان میں بلدیاتی انتخابات دو دہائیوں سے زائد عرصے کے وقفے کے بعد منعقد کیے جا رہے ہیں۔ انتخابات کے انعقاد میں اس سے قبل بھی موسم کی شدت، انتظامی معاملات اور لوکل گورنمنٹ ایکٹ میں ترامیم کے باعث تاخیر ہوتی رہی ہے۔
