ایرانی حکومت کا خاتمہ اسرائیل کا مرکزی مشن، ہدف اب دور نہیں، نیتن یاہو کا فوج سے خطاب
ایرانی حکومت کا خاتمہ اسرائیل کا مرکزی مشن، ہدف اب دور نہیں، نیتن یاہو کا فوج سے خطاب
تل ابیب، 3 ستمبر: اسرائیلی وزیراعظم بنیامین نیتن یاہو نے کہا ہے کہ ایران کی موجودہ حکومت کا خاتمہ اسرائیل کا مرکزی مشن بن چکا ہے اور یہ ہدف اب اسرائیل کی دسترس سے باہر نہیں۔
تل ابیب میں اسرائیلی فوج کے جنرل اسٹاف فورم سے خطاب کرتے ہوئے نیتن یاہو نے کہا کہ انہیں ایران سے لاحق خطرے کو مستقل طور پر ختم کرنے اور ایرانی حکومت کا تختہ الٹنے کی اسرائیل کی صلاحیت پر مکمل اعتماد ہے۔
اسرائیلی وزیراعظم نے دعویٰ کیا کہ ایرانی قیادت اس وقت انتہائی کمزور حالت میں ہے اور اپنی بقا کی جنگ لڑ رہی ہے۔ ان کے بقول اسرائیل نے جنگ کے دوران متعدد اہم اہداف حاصل کیے ہیں، تاہم ایرانی حکومت کا خاتمہ اب مرکزی مشن کی حیثیت اختیار کرچکا ہے۔
نیتن یاہو نے کہا کہ اسرائیل کے پاس ایران سے لاحق خطرے کو ہمیشہ کے لیے ختم کرنے کی صلاحیت موجود ہے اور ایرانی حکومت کا تختہ الٹنا ایک ایسا ہدف ہے جو حاصل کیا جاسکتا ہے۔
انہوں نے اسرائیلی فوج کی حالیہ کارروائیوں کا ذکر کرتے ہوئے فوجی قیادت کی صلاحیتوں اور جنگی کارکردگی پر اعتماد کا اظہار کیا۔ اجلاس میں اسرائیلی وزیر دفاع اسرائیل کاٹز، چیف آف اسٹاف ایال زامیر اور جنرل اسٹاف فورم کے دیگر ارکان بھی موجود تھے۔
نیتن یاہو نے اسرائیل کے مخالفین کو خبردار کرتے ہوئے کہا کہ وہ اسرائیل کی طاقت اور عزم کو چیلنج کرنے سے گریز کریں۔
اسرائیلی وزیراعظم کے یہ بیانات ایران اور اسرائیل کے درمیان جاری شدید کشیدگی کے تناظر میں سامنے آئے ہیں، جبکہ خطے میں امریکی فوجی موجودگی اور ایران کے خلاف امریکی دباؤ نے صورتحال کو مزید پیچیدہ بنا دیا ہے۔
رپورٹس کے مطابق ایران کی جانب سے خطے میں امریکی اہداف پر میزائل اور ڈرون حملوں کی اطلاعات بھی سامنے آتی رہی ہیں، جبکہ اسرائیل ایران کے جوہری پروگرام، میزائل صلاحیت اور خطے میں ایرانی اثر و رسوخ کو اپنے لیے اہم خطرہ قرار دیتا ہے۔
