پاکستان نے 2010 کے بعد ہاکی ورلڈ کپ میں پہلا میچ جیت لیا، جاپان کو 3-4 سے شکست دے دی
پاکستان نے 2010 کے بعد ہاکی ورلڈ کپ میں پہلا میچ جیت لیا، جاپان کو 3-4 سے شکست دے دی
ایمسٹیلوین، 23 اگست: پاکستان نے ایف آئی ایچ مینز ہاکی ورلڈ کپ 2026 کے 9ویں سے 16ویں پوزیشن کے کلاسیفکیشن میچ میں جاپان کو 3 کے مقابلے میں 4 گول سے شکست دے کر 16 سال بعد ورلڈ کپ میں پہلی کامیابی حاصل کرلی۔
پاکستان نے دو گول کے خسارے میں جانے کے باوجود شاندار کم بیک کیا۔ جاپان نے پہلے کوارٹر میں ہائوٹا یامادا اور کائیٹو تاناکا کے گولز کی بدولت 2-0 کی برتری حاصل کی، تاہم پاکستان کے رانا وحید نے دوسرے کوارٹر میں گول کرکے خسارہ کم کردیا۔
تیسرے کوارٹر میں رانا وحید نے اپنا دوسرا گول کیا، جبکہ حمادالدین نے اگلے ہی منٹ میں گول کرکے پاکستان کو 3-2 کی برتری دلادی۔ جاپان کے کوجی یاماساکی نے اس کے بعد گول کرکے مقابلہ 3-3 سے برابر کردیا، تاہم حنان شاہد نے 40ویں منٹ میں فیصلہ کن گول کرکے پاکستان کو 4-3 سے آگے کردیا۔
میچ کے آخری لمحات میں جاپان نے برابری کی بھرپور کوشش کی، تاہم پاکستانی دفاع نے دباؤ کا کامیابی سے مقابلہ کرتے ہوئے برتری برقرار رکھی اور فتح اپنے نام کرلی۔
یہ پاکستان کی 2010 کے بعد ہاکی ورلڈ کپ میں پہلی فتح ہے۔ قومی ٹیم نے آخری مرتبہ 2010 کے ورلڈ کپ میں اسپین کو 2-1 سے شکست دی تھی۔ اس کے بعد پاکستان 2014 کے ورلڈ کپ کے لیے کوالیفائی نہیں کرسکا، جبکہ 2018 کے ایڈیشن میں بھی کوئی میچ نہیں جیت سکا۔
رواں ورلڈ کپ میں پاکستان کی ٹیم مرکزی راؤنڈ سے اگلے مرحلے کے لیے کوالیفائی نہیں کرسکی اور اب 9ویں سے 16ویں پوزیشن کے کلاسیفکیشن مرحلے میں حصہ لے رہی ہے۔ جاپان کے خلاف کامیابی نے قومی ٹیم کے لیے 16 سالہ ورلڈ کپ فتح کے انتظار کو ختم کردیا ہے۔
