زونگ اور زندگی کی جانب سے ڈیجیٹل مالیاتی سہولیات کیلئے زی والٹ متعارف
اسلام آباد (نمائندہ خصوصی)۔ پاکستان کی معروف ٹیکنالوجی سروسز کمپنی زونگ نے جے ایس بینک کے مالیاتی پلیٹ فارم (زندگی) کے اشتراک سے زی والٹ (Z-Wallet) متعارف کرا دیا ہے، جس کے ذریعے زندگی کے بینکنگ اینڈ سروس (BaaS) انفراسٹرکچر کی مدد سے ریگولیٹڈ ڈیجیٹل مالیاتی سروسز براہ راست مائی زونگ ایپ میں فراہم کی جائیں گی۔ اس پیشرفت کے بعد پاکستان میں ڈیجیٹل معیشت کی تشکیل میں مدد ملے گی، جیسا کہ پاکستان کو کیش لیس معیشت بنانے کیلئے عملی اقدامات جاری ہیں۔
تقریب کا انعقاد
اسلام آباد کے مقامی ہوٹل میں منعقدہ افتتاحی تقریب میں وفاقی وزیر اطلاعات و نشریات عطااللہ تارڑ سمیت انڈسٹری کی دیگر اہم شخصیات اور حکومتی نمائندوں نے شرکت کی۔ زی والٹ کا اجرا پاکستان میں ٹیلی کمیونیکیشن اور ڈیجیٹل مالیاتی سروسز کے ارتقا کی جانب ایک اہم سنگ میل ہے، جس سے زیادہ استعمال ہونے والے پلیٹ فارمز میں براہِ راست بینکاری سہولیات شامل کرکے آسان، قابل رسائی اور مربوط ڈیجیٹل تجربات فراہم کیے جاسکتے ہیں۔
صارفین کیلئے سہولیات
مائی زونگ ایپ کے ماہانہ دو کروڑ بیس لاکھ سے زائد فعال صارفین اب الگ بینکاری ایپ ڈاؤن لوڈ یا اس پر منتقل ہوئے بغیر اپنی پہلی ایپ کے اندر رہتے ہوئے بینکنگ کی بنیادی سروسز حاصل کرسکیں گے۔ یہ اقدام زونگ کی روایتی ٹیلی کمیونیکیشن آپریٹر سے ایک وسیع تر ٹیکنالوجی سروسز ادارے میں تبدیلی کی جانب ایک اور قدم ہے۔ زی والٹ جے ایس بینک کے تحت زندگی کے ریگولیٹڈ بینکاری انفراسٹرکچر پر قائم ہے اور اسٹیٹ بینک آف پاکستان کے ریگولیٹری فریم ورک کے تحت کام کرے گا۔ زی والٹ صارفین راست کے ذریعے پاکستان کے کسی بھی بینک میں انٹر بینک فنڈ ٹرانسفر، یوٹیلیٹی اور انٹرنیٹ بلوں کی ادائیگی اور موبائل ٹاپ اپ سمیت مختلف سروسز ایک ہی لاگ اِن اور پن کے ذریعے حاصل کرسکیں گے۔ مستقبل میں اس سروس کو مزید وسعت دی جائے گی جس کے تحت چھوٹے قرضے، زی ڈیبٹ کارڈ اور خصوصی زونگ بنڈلز جیسی سروسز شامل کی جائیں گی۔
قیادت کے خیالات
وفاقی وزیر اطلاعات عطااللہ تارڑ نے کہا کہ، ”پاکستان کی ڈیجیٹل تبدیلی کو شہریوں کے لیے زیادہ رسائی، مواقع اور سہولت میں تبدیل ہونا چاہیے۔ زی والٹ کا اجرا اس امر کی مثبت مثال ہے کہ ٹیلی کمیونیکیشن اور مالیاتی ٹیکنالوجی مل کر کیسے ڈیجیٹل مالیاتی سروسز تک رسائی بڑھا سکتے ہیں۔“ زونگ کے مارکیٹنگ ہیڈ ساجد منیر نے کہا کہ، ”زی والٹ کا اجرا زونگ کے ڈیجیٹل پراڈکٹس پورٹ فولیو کو مالیاتی سروسز تک وسعت دینے کی جانب ایک قدم ہے۔“ زندگی کے شریک بانی نعمان اظہر نے کہا کہ، ”زی والٹ ایمبیڈڈ فنانس کی ایک بہترین مثال ہے جو زونگ اور زندگی کو یکجا کرتا ہے۔“ یہ شراکت داری دنیا بھر میں تیزی سے فروغ پانے والے ایمبیڈڈ فنانس کے رجحان کی عکاسی کرتی ہے۔ اس اقدام کا مقصد مالیاتی شمولیت کو فروغ دینا ہے۔ ابتدائی طور پر اس سروس کے حوصلہ افزا نتائج سامنے آئے ہیں اور چند ہفتوں میں بارہ ہزار سے زائد ٹرانزیکشنز مکمل ہوئیں۔ زونگ اس اقدام کے ذریعے اپنی مصنوعی ذہانت (AI) کی حکمت عملی کو بھی فروغ دے رہا ہے تاکہ صارفین کو بہتر تجربہ فراہم کیا جا سکے۔
