اسحاق ڈار اور کویتی وزیر خارجہ کی ٹیلی فونک گفتگو، مکہ مشترکہ دفاعی معاہدے پر مبارکباد
اسحاق ڈار اور کویتی وزیر خارجہ کی ٹیلی فونک گفتگو، مکہ مشترکہ دفاعی معاہدے پر مبارکباد
اسلام آباد: نائب وزیراعظم و وزیر خارجہ محمد اسحاق ڈار اور کویتی وزیر خارجہ شیخ جراح جابر الاحمد الصباح کے درمیان ٹیلی فون پر گفتگو ہوئی، جس میں مکہ میں پاکستان، سعودی عرب اور ترکیہ کے درمیان طے پانے والے مشترکہ دفاعی معاہدے سمیت علاقائی صورتحال اور دوطرفہ تعلقات پر تبادلہ خیال کیا گیا۔
ترجمان دفتر خارجہ کے مطابق کویتی وزیر خارجہ نے مکہ میں حالیہ طے پانے والے مشترکہ دفاعی معاہدے پر اسحاق ڈار کو مبارکباد پیش کی۔
دونوں وزرائے خارجہ نے مقبوضہ مشرقی یروشلم سمیت خطے کی مجموعی صورتحال اور باہمی دلچسپی کے مختلف امور پر بھی تبادلہ خیال کیا۔
گفتگو کے دوران پاکستان اور کویت کے دوطرفہ تعلقات اور کویتی وزیر خارجہ کے حالیہ دورۂ پاکستان کے بعد ہونے والی پیش رفت کا جائزہ لیا گیا۔
دونوں رہنماؤں نے اہم شعبوں میں باہمی تعاون اور سرمایہ کاری کو مزید فروغ دینے کے امکانات پر بھی گفتگو کی۔
ترجمان کے مطابق پاکستان اور کویت نے دوطرفہ تعاون کو مزید مضبوط بنانے اور مختلف امور پر قریبی رابطے برقرار رکھنے پر اتفاق کیا۔
