چین میں دفاعی ٹیکنالوجی ادارے کے سابق نائب سربراہ کو رشوت کے جرم میں 10 سال قید کی سزا
چین میں دفاعی ٹیکنالوجی ادارے کے سابق نائب سربراہ کو رشوت کے جرم میں 10 سال قید کی سزا
بیجنگ: چین کے دفاعی سائنس، ٹیکنالوجی اور صنعت کی ریاستی انتظامیہ (SASTIND) کے سابق نائب سربراہ ژانگ جیانہوا کو رشوت لینے اور اپنے سابق سرکاری عہدے کے اثر و رسوخ کا ناجائز استعمال کرتے ہوئے مالی فوائد حاصل کرنے کے جرم میں 10 سال قید کی سزا سنا دی گئی۔
شِنہوا نیوز ایجنسی کے مطابق صوبہ سیچوان کے شہر دازو کی انٹرمیڈیٹ پیپلز کورٹ نے پہلی سماعت میں ژانگ جیانہوا کو رشوت لینے کے جرم میں آٹھ سال قید اور 30 لاکھ یوآن جرمانے کی سزا سنائی، جبکہ سابق عہدے کے اثر و رسوخ کے ذریعے رشوت لینے کے جرم میں پانچ سال قید اور 8 لاکھ یوآن جرمانہ عائد کیا۔ عدالت نے دونوں سزاؤں کو ملا کر مجموعی طور پر 10 سال قید اور 38 لاکھ یوآن جرمانے کا حکم دیا۔
عدالت نے ژانگ جیانہوا کی غیرقانونی طور پر حاصل کی گئی تمام رقم اور اثاثے ضبط کرکے قومی خزانے میں جمع کرانے کا بھی حکم دیا۔
عدالتی فیصلے کے مطابق ژانگ نے 2008 سے 2025 کے دوران اپنے سرکاری عہدوں کا ناجائز فائدہ اٹھاتے ہوئے انتظامی منظوریوں، ایکویٹی سرمایہ کاری اور دیگر معاملات میں مختلف افراد کو غیرقانونی فوائد پہنچائے اور اس کے بدلے 4 کروڑ 33 لاکھ 80 ہزار یوآن سے زائد مالیت کی رقم اور قیمتی اشیا بطور رشوت وصول کیں۔
شِنہوا کے مطابق ریٹائرمنٹ کے بعد بھی ژانگ نے 2021 سے 2025 کے دوران اپنے سابق عہدے کے اثر و رسوخ کو استعمال کرتے ہوئے کاروباری سرگرمیوں اور منصوبوں کے ٹھیکوں میں غیرقانونی فوائد دلائے اور اس کے بدلے ایک کروڑ 17 لاکھ یوآن مالیت کے اثاثے حاصل کیے۔
عدالت نے قرار دیا کہ ژانگ نے اپنے جرائم کا اعتراف کیا، تفتیش میں تعاون کیا، غیرقانونی دولت واپس کی اور ندامت کا اظہار کیا، جس کے باعث انہیں قانون کے مطابق نسبتاً کم سزا دی گئی۔
