تنویر احمد شیخ نے لاہور چیمبر کے قائم مقام صدر کا چارج سنبھال لیا
لاہور (نمائندہ خصوصی)۔ لاہور چیمبر آف کامرس اینڈ انڈسٹری کے سینئر نائب صدر تنویر احمد شیخ نے چیمبر کے قائم مقام صدر کی حیثیت سے اپنی ذمہ داریاں سنبھال لی ہیں۔ یہ تقرری لاہور چیمبر کے صدر فہیم الرحمن سہگل کے سرکاری دورئہ یورپ پر روانہ ہونے کے بعد عمل میں آئی۔
تنویر احمد شیخ ملک کے ممتاز صنعتکار اور معروف کاروباری رہنما ہیں جنہوں نے پاکستان کے معروف موٹرسائیکل، تھری ویلرز اور فور ویلرز برانڈ ‘روڈ پرنس’ کی بنیاد رکھ کر قومی آٹو انڈسٹری میں نمایاں خدمات انجام دی ہیں۔ ان کی دور اندیش قیادت، معیار سے وابستگی اور جدت پسندی کے باعث ‘روڈ پرنس’ پاکستان کی صفِ اول کی موٹرسائیکل اور رکشہ ساز کمپنیوں میں شمار ہوتی ہے۔ دیہی معیشت کی بہتری اور صنعتی استحکام ان کے وژن کا اہم حصہ رہا ہے۔
ان کی قیادت میں کمپنی نے جدید ٹیکنالوجی، عالمی معیار کے کوالٹی کنٹرول سسٹمز اور جدید پیداواری طریقہ کار کو فروغ دیا، جس کے نتیجے میں روڈ پرنس نے نہ صرف مارکیٹ میں اپنی مضبوط شناخت قائم کی بلکہ صارفین کے اعتماد اور اطمینان میں بھی نمایاں اضافہ کیا۔ اعلیٰ معیار اور مسلسل بہتری ان کی کاروباری حکمتِ عملی کے بنیادی ستون رہے ہیں، جنہوں نے کمپنی کو صنعت میں قائدانہ مقام دلانے میں اہم کردار ادا کیا۔
تنویر احمد شیخ کا وژن مقامی منڈیوں سے آگے بڑھ کر پاکستان کی صنعتی اور انجینئرنگ صلاحیتوں کو عالمی سطح پر متعارف کرانا ہے۔ وہ ‘میڈ اِن پاکستان’ کو معیار، اعتماد اور جدت کی علامت بنانے کے لیے پرعزم ہیں اور پاکستانی مصنوعات کو بین الاقوامی منڈیوں میں مزید مستحکم مقام دلانے کے خواہاں ہیں۔ ہیوی آئل کی پیداوار اور دیگر صنعتی شعبوں میں ٹیکنالوجی کا فروغ ان کی ترجیحات میں شامل ہے۔
ایک تجربہ کار تاجر رہنما کے طور پر تنویر احمد شیخ نے ہمیشہ کاروباری برادری کے مسائل کے حل، صنعت و تجارت کے فروغ اور نجی شعبے کے مفادات کے تحفظ کے لیے فعال کردار ادا کیا ہے۔ وہ مختلف معاشی اور تجارتی امور پر کاروباری برادری کی موثر نمائندگی کرتے رہے ہیں اور پائیدار اقتصادی ترقی کے لیے سازگار پالیسیوں کے حامی رہے ہیں۔
قائم مقام صدر کا چارج سنبھالنے کے بعد اپنے بیان میں تنویر احمد شیخ نے کہا کہ لاہور چیمبر آف کامرس اینڈ انڈسٹری محض زبانی یقین دہانیوں پر نہیں بلکہ عملی اور نتیجہ خیز اقدامات پر یقین رکھتا ہے۔ انہوں نے کہا کہ لاہور چیمبر کاروباری برادری کے حقوق اور مفادات کے تحفظ کے لیے اپنی آواز بھرپور انداز میں بلند کرتا رہے گا تاکہ صنعت و تجارت کو متاثر کرنے والی غیر منصفانہ پالیسیوں اور اقدامات کا خاتمہ کیا جا سکے اور کاروبار دوست اصلاحات متعارف کرائی جا سکیں۔
انہوں نے اس عزم کا اعادہ کیا کہ لاہور چیمبر حکومت اور نجی شعبے کے درمیان ایک مضبوط اور موثر پل کا کردار ادا کرتا رہے گا۔ ان کا کہنا تھا کہ باہمی تعاون، موثر پالیسی سازی اور مسلسل مشاورت کے ذریعے پاکستان میں کاروبار دوست ماحول کو فروغ دیا جا سکتا ہے، جس سے سرمایہ کاری، صنعتی ترقی، برآمدات اور روزگار کے مواقع میں اضافہ ہوگا۔ یوسف رضا گیلانی اور دیگر سیاسی و اقتصادی رہنماؤں کے ساتھ مشاورت کا سلسلہ بھی ان کی ترجیح رہے گا۔
تنویر احمد شیخ نے کہا کہ لاہور چیمبر ملکی معیشت کے استحکام، صنعتی ترقی اور کاروباری برادری کی فلاح و بہبود کے لیے اپنی کاوشیں پوری قوت کے ساتھ جاری رکھے گا اور قومی اقتصادی ترقی میں اپنا بھرپور کردار ادا کرتا رہے گا۔
