شہباز شریف نے ایران-امریکہ تنازعہ کے پرامن حل کے لیے پاکستان کی کوششوں کو اجاگر کیا
اسلام آباد (نمائندہ خصوصی)۔ وزیراعظم محمد شہباز شریف نے ایرانی قیادت کی جانب سے جاری بحران کو تحمل، وقار اور دانشمندی سے سنبھالنے کو سراہتے ہوئے امریکہ اور ایران کے درمیان تنازعہ کے حل کے لیے جاری سفارتی کوششوں کی کامیابی کے لیے امید کا اظہار کیا ہے۔ انہوں نے کہا کہ پاکستان خطے میں مذاکرات، کشیدگی میں کمی اور پائیدار امن کے فروغ کے لیے اپنی حمایت جاری رکھے گا۔
وزیراعظم نے کہا کہ پاکستان، قطر کے ساتھ مل کر امریکہ اور ایران کے درمیان مذاکرات کو آگے بڑھانے اور علاقائی کشیدگی کم کرنے کے لیے سرگرم کردار ادا کر رہا ہے۔ انہوں نے ایرانی قیادت، بشمول سپریم لیڈر آیت اللہ مجتبیٰ خامنہ ای، صدر مسعود پزشکیان اور پارلیمنٹ کے سپیکر محمد باقر قالیباف کی جانب سے کشیدگی میں کمی اور امن کے لیے مخلصانہ عزم کی تعریف کی۔
وزیراعظم نے کہا کہ انہیں یقین ہے کہ ایرانی قیادت خطے میں دیرپا امن اور استحکام کے فروغ کے لیے پرعزم ہے۔ انہوں نے کہا کہ موجودہ سفارتی سرگرمی استحکام کے فروغ اور علاقائی و بین الاقوامی شراکت داروں کے درمیان تعاون کے نئے مواقع پیدا کرنے کا ایک اہم موقع فراہم کرتی ہے۔ انہوں نے تنازعات کے پرامن حل اور مذاکرات کے فروغ کے لیے پاکستان کے عزم کا اعادہ کیا۔
