اسحاق ڈار اور جاپانی وزیر خارجہ کا رابطہ، پاکستان کے کردار کی تعریف

اسلام آباد (اے پی پی)۔ نائب وزیراعظم و وزیر خارجہ سینیٹر محمد اسحاق ڈار سے جاپان کی وزیرِ خارجہ کامیکاوا یوکو نے ٹیلی فون پر رابطہ کیا ہے، جس میں دوطرفہ تعلقات اور اہم علاقائی امور پر تبادلہ خیال کیا گیا۔

وزارت خارجہ سے جاری بیان کے مطابق دونوں رہنماؤں نے امریکا اور ایران کے درمیان طے پانے والی حالیہ مفاہمت کا خیرمقدم کیا اور علاقائی استحکام سمیت وسیع تر عالمی برادری کے لیے اس کی اہمیت کو تسلیم کیا۔

پاکستان کے مصالحتی کردار کی ستائش

اس موقع پر جاپان کی وزیرِ خارجہ نے اس تمام عمل کے دوران پاکستان کے مستقل مصالحتی کردار اور تعمیری کوششوں کو سراہتے ہوئے جاپانی حکومت کی طرف سے تعریف اور ستائش کا اظہار کیا۔ انہوں نے اس بات پر زور دیا کہ پاکستان کی کاوشوں نے مثبت نتائج کے حصول کو آسان بنانے اور آگے بڑھانے میں اہم کردار ادا کیا ہے۔

باہمی تعاون جاری رکھنے کا عزم

دونوں رہنماؤں نے مسلسل سفارتی رابطوں کی اہمیت پر زور دیتے ہوئے اس عزم کا اعادہ کیا کہ باہمی تعلقات کو مزید مضبوط بنانے اور مشترکہ دلچسپی کے امور پر قریبی تعاون اور باقاعدہ تبادلہ خیال جاری رکھا جائے گا۔