حکومت نے فیول سبسڈی کی مد میں 5.4 ارب روپے تقسیم کر دیے، سینیٹ کو آگاہی
اسلام آباد: وزیر خزانہ و محصولات محمد اورنگزیب نے سینیٹ کو بتایا ہے کہ حکومت نے ٹارگٹڈ فیول سبسڈی پروگرام کے تحت اب تک 5.4 ارب روپے تقسیم کیے ہیں، جبکہ چھوٹے کسانوں کو 4.61 ارب روپے کی معاونت فراہم کی جا چکی ہے۔
پیٹرولیم مصنوعات کی قیمتوں میں حالیہ اضافے اور صنعتی پیداوار و قومی معیشت پر اس کے اثرات سے متعلق توجہ دلاؤ نوٹس کا جواب دیتے ہوئے وزیر خزانہ نے کہا کہ مشرق وسطیٰ میں کشیدگی کے باعث عالمی تیل قیمتوں میں اضافے کے بعد حکومت نے ریلیف پیکج کا اعلان کیا۔
انہوں نے کہا کہ عوام پر بوجھ کم کرنے کے لیے مجموعی طور پر 129 ارب روپے کی سبسڈی فراہم کی گئی۔ ابتدا میں عمومی سبسڈی دی گئی، تاہم بعد میں اسے ٹارگٹڈ پروگرام میں تبدیل کیا گیا تاکہ ریلیف موٹر سائیکل مالکان، پبلک ٹرانسپورٹ صارفین، ٹرانسپورٹ آپریٹرز اور چھوٹے کسانوں تک پہنچ سکے۔
محمد اورنگزیب نے بتایا کہ تقریباً 8 لاکھ موٹر سائیکل مالکان اس اسکیم سے مستفید ہوئے، جبکہ مسافر اور مال بردار گاڑیوں کے مالکان کو 35 ہزار سے ایک لاکھ روپے تک مالی معاونت فراہم کی گئی۔
وزیر خزانہ کے مطابق پہلے مرحلے میں ایک لاکھ پانچ ہزار سے زائد اہل گاڑی مالکان میں 3.5 ارب روپے تقسیم کیے گئے، جبکہ دوسرے مرحلے میں 65 ہزار سے زائد مستحقین کو 1.9 ارب روپے شفاف تصدیقی نظام کے ذریعے فراہم کیے گئے۔
انہوں نے کہا کہ یہ پروگرام صوبائی حکومتوں کے تعاون سے نافذ کیا گیا تاکہ ریلیف مستحق افراد تک پہنچے اور ٹرانسپورٹ کرایوں کو قابو میں رکھنے میں مدد مل سکے۔
وزیر خزانہ نے کہا کہ حکومت کم آمدنی والے طبقات کو بلند ایندھن قیمتوں کے اثرات سے بچانے اور معاشی استحکام برقرار رکھنے کے لیے اقدامات جاری رکھے گی۔
