اسحاق ڈار کا آسیان کی امن و خوشحالی کی کوششوں کے لیے پاکستان کی حمایت کا اعادہ
اسحاق ڈار کا آسیان کی امن و خوشحالی کی کوششوں کے لیے پاکستان کی حمایت کا اعادہ
اسلام آباد، 8 اگست (اے پی پی): نائب وزیراعظم و وزیر خارجہ سینیٹر محمد اسحاق ڈار نے ہفتہ کو کہا ہے کہ پاکستان کا پختہ یقین ہے کہ جامع مذاکرات، باہمی اعتماد اور بین الاقوامی تعاون مشترکہ چیلنجز سے نمٹنے کا مؤثر ترین ذریعہ ہیں۔ انہوں نے خطے میں امن، استحکام، خوشحالی اور پائیدار ترقی کے فروغ کے لیے آسیان کی جاری کوششوں کی بھرپور حمایت کا اعادہ کیا۔
آسیان کے 59ویں یومِ تاسیس کے موقع پر اپنے پیغام میں نائب وزیراعظم نے کہا کہ جنوب مشرقی ایشیائی ممالک کی تنظیم (آسیان) علاقائی انضمام اور کمیونٹی سازی کے سفر کو آگے بڑھا رہی ہے اور پاکستان ایک پرامن، خوشحال اور مربوط خطے کے مشترکہ وژن کے فروغ کے لیے آسیان کے ساتھ قریبی تعاون جاری رکھنے کے لیے پرعزم ہے۔
وزارت خارجہ کے ترجمان کی جانب سے جاری بیان کے مطابق نائب وزیراعظم نے حکومت اور عوام پاکستان کی جانب سے آسیان کے یومِ تاسیس پر مبارکباد پیش کی اور آسیان کے سیکرٹری جنرل ڈاکٹر کاؤ کم ہورن کو علاقائی تعاون، لچک اور خوشحالی کے آسیان کے وژن کو آگے بڑھانے کے لیے ان کی مثالی قیادت اور مسلسل کوششوں پر مبارکباد دی۔
انہوں نے کہا کہ آسیان ڈے اتحاد، یکجہتی اور تعاون کے اس پائیدار جذبے کی عکاسی کرتا ہے جس نے جنوب مشرقی ایشیا کی اقوام کو باہم متحد کیا ہے۔ پاکستان اپنے آسیان دوستوں کے ساتھ اس اہم موقع کی یاد منا رہا ہے اور خطے کے ساتھ اپنی دیرینہ دوستی اور شراکت داری کے عزم کا اعادہ کرتا ہے۔
اسحاق ڈار نے کہا کہ آسیان علاقائی انضمام اور اجتماعی ترقی کا ایک قابلِ ذکر نمونہ ہے، جس نے اقتصادی ترقی، سماجی ہم آہنگی اور سفارتی روابط کے شعبوں میں نمایاں کامیابیاں حاصل کی ہیں۔
انہوں نے کہا کہ پاکستان ایشیا پیسیفک خطے میں امن، استحکام اور خوشحالی کے فروغ میں آسیان کے اہم کردار کو قدر کی نگاہ سے دیکھتا ہے۔ آسیان ڈے علاقائی تعاون کی اہمیت کے اعادے کے ساتھ ساتھ جنوب مشرقی ایشیا کے بھرپور ثقافتی تنوع اور تاریخی ورثے کو اجاگر کرنے کا بھی موقع فراہم کرتا ہے۔
نائب وزیراعظم نے کہا کہ پاکستان اور آسیان کے تعلقات باہمی احترام، عدم مداخلت اور تعمیری روابط کے مشترکہ اصولوں پر استوار ہیں۔ پاکستان آسیان کی قیادت میں ہونے والے مذاکراتی طریقہ کار میں فعال طور پر حصہ لیتا رہا ہے اور تجارت، سرمایہ کاری، تعلیم، ثقافت اور عوامی روابط سمیت باہمی دلچسپی کے شعبوں میں تعاون کو مزید فروغ دینے کے لیے پرعزم ہے۔
انہوں نے کہا کہ آسیان کے ساتھ پاکستان کے روابط کو آسیان ریجنل فورم (اے آر ایف) میں پاکستان کی فعال شرکت سے مزید تقویت ملی ہے، جہاں پاکستان علاقائی امن، سلامتی اور تعاون کے فروغ کے لیے اجتماعی کوششوں میں اپنا کردار ادا کر رہا ہے۔
دنیا کو درپیش بڑھتے ہوئے عالمی چیلنجز اور غیر یقینی صورتحال کے تناظر میں اسحاق ڈار نے کہا کہ آسیان کا اتحاد اور مکالمے، باہمی افہام و تفہیم اور پرامن تعاون کے لیے اس کا مستقل عزم قابلِ تحسین ہے۔
