چین ہر سال تین لاکھ پاکستانی نوجوانوں کو ڈیجیٹل تربیت دے گا
اسلام آباد/لاہور (نمائندہ خصوصی)۔ وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے کہا ہے کہ چین ہر سال تین لاکھ پاکستانی نوجوانوں کو ڈیجیٹل سکلز کی تربیت فراہم کرے گا جس سے ملک میں ٹیکنالوجی اور نالج اکانومی کو مزید فروغ ملے گا۔ وفاقی وزیر نے کہا ہے کہ پاکستان کی آئی ٹی برآمدات 4.6 ارب ڈالر کی بلند ترین سطح پر پہنچ چکی ہیں اور پاکستان فری لانسنگ کے شعبے میں دنیا کا چوتھا بڑا ملک بن چکا ہے۔ نوجوانوں کی صلاحیتیں ملک کی ڈیجیٹل معیشت اور برآمدات میں اضافے کا اہم ذریعہ ہیں۔ انہوں نے زور دیا کہ فری لانسرز اور آئی ٹی پروفیشنلز مصنوعی ذہانت اور جدید ٹیکنالوجیز سے خود کو ہم آہنگ کریں تاکہ عالمی منڈی میں اپنی مسابقت برقرار رکھ سکیں۔
لاہور چیمبر کی تقریب سے خطاب
انہوں نے ان خیالات کا اظہار لاہور چیمبر کے زیر اہتمام منعقدہ تیسرے آئی ٹی فری لانسنگ ایوارڈز 2026 کی تقریب کے دوران صدر لاہور چیمبر فہیم الرحمٰن سہگل سے گفتگو کرتے ہوئے کیا۔ پروفیسر احسن اقبال نے کہا کہ جدید دور میں کامیابی کے لیے بڑے دفاتر یا بھاری سرمایہ کاری کی ضرورت نہیں بلکہ علم، ہنر اور ٹیکنالوجی تک رسائی ہی اصل سرمایہ ہے۔ انہوں نے کہا کہ پاکستانی نوجوان دنیا بھر کے کلائنٹس کو خدمات فراہم کرکے نہ صرف اپنی صلاحیتوں کا لوہا منوا رہے ہیں بلکہ ملک کے لیے قیمتی زرمبادلہ بھی کما رہے ہیں۔ اس موقع پر لاہور چیمبر آف کامرس اینڈ انڈسٹری کے صدر فہیم الرحمٰن سہگل نے کہا کہ حکومت اور نجی شعبہ باہمی تعاون سے پاکستان کو خطے کا مضبوط ڈیجیٹل اکانومی ہب بنا سکتے ہیں۔ انہوں نے کہا کہ "اڑان پاکستان” وڑن میں انوویشن، آئی ٹی اور ڈیجیٹل معیشت بنیادی اہمیت رکھتے ہیں اور پاکستانی فری لانسرز اس خواب کو حقیقت میں بدلنے کی صلاحیت رکھتے ہیں۔
فری لانسرز ملکی معیشت کا ستون
پنجاب کے وزیرِ خزانہ میاں مجتبیٰ شجاع الرحمٰن نے کہا کہ پاکستان کے باصلاحیت فری لانسرز کی کامیابیوں کو سراہنے کے لیے لاہور چیمبر کی کاوشیں قابلِ تحسین ہیں۔ انہوں نے کہا کہ فری لانسنگ اب متبادل پیشہ نہیں بلکہ پاکستان کی ڈیجیٹل اکانومی کا ایک مضبوط اور اہم ستون بن چکی ہے جبکہ پاکستانی فری لانسرز ہر سال کروڑوں ڈالر کا زرمبادلہ ملک میں لا کر قومی معیشت کو مستحکم کر رہے ہیں۔ انہوں نے کہا کہ پاکستانی فری لانسرز درحقیقت ملک کے ڈیجیٹل سفیر ہیں جو عالمی سطح پر پاکستان کا مثبت تشخص اجاگر کر رہے ہیں۔ پنجاب حکومت فری لانسرز کو درپیش ادائیگیوں کی رکاوٹیں دور کرنے کے لیے وفاقی حکومت اور ایس آئی ایف سی کے ساتھ رابطے میں ہے۔
ڈیجیٹل انفراسٹرکچر اور حکومتی عزم
میاں مجتبیٰ شجاع الرحمٰن نے کہا کہ وزیراعلیٰ پنجاب مریم نواز شریف کی قیادت میں صوبے میں ڈیجیٹل انفراسٹرکچر، انوویشن، ٹیکنالوجی پارکس، آئی ٹی زونز اور انوویشن ہبز کے قیام پر بھرپور سرمایہ کاری کی جا رہی ہے، جس سے نوجوانوں کے لیے روزگار اور کاروبار کے نئے مواقع پیدا ہوں گے۔ انہوں نے کہا کہ پنجاب پاکستان کا پہلا صوبہ ہے جس نے بڑے پیمانے پر آرٹیفیشل انٹیلی جنس اقدامات کا آغاز کیا ہے اور حکومت پنجاب صوبے کو مصنوعی ذہانت، انوویشن اور ڈیجیٹل انٹرپرینیورشپ کا قومی مرکز بنانا چاہتی ہے۔ انہوں نے کہا کہ حکومت کا وڑن نوجوانوں کو صرف کامیاب فری لانسر نہیں بلکہ اے آئی ڈویلپرز، اسٹارٹ اپ بانی اور عالمی سطح کے ٹیکنالوجی لیڈر بنانا ہے۔ نیوٹک نے پاکستان اور چین کے درمیان تکنیکی تعاون کو فروغ دیا ہے جبکہ اس طرح کے اقدامات سے ملکی معاشی ترقی کی رفتار مزید تیز ہو گی۔ حکومت بدعنوانی کے خلاف بلاامتیاز مہم جاری رکھے گی، بیرسٹر عقیل ملک نے بھی حال ہی میں اس بات کا اعادہ کیا ہے کہ ملکی ترقی کیلئے شفافیت ناگزیر ہے۔
