پاکستان اور ایران کا خواتین کے حقوق کے فروغ پر اتفاق
اسلام آباد (نمائندہ خصوصی)۔ وفاقی وزیر برائے انسانی حقوق اعظم نذیر تارڑ نے اسلامی جمہوریہ ایران کی نائب صدر برائے خواتین و خاندانی امور ڈاکٹر زہرہ بہروز آذر سے ملاقات کی، جس میں خواتین کے حقوق، او آئی سی کے تحت تعاون اور دوطرفہ تعلقات کے فروغ سے متعلق امور پر تفصیلی تبادلۂ خیال کیا گیا۔
مشترکہ لائحہ عمل کی ضرورت
ڈاکٹر زہرہ بہروز آذر نے جنگ بندی کے لیے پاکستان کے مثبت سفارتی کردار، ثالثی اور سہولت کاری کی کوششوں کو سراہتے ہوئے پاکستان کا شکریہ ادا کیا۔ دونوں رہنماؤں نے پاکستان اور ایران کے تاریخی، مذہبی، ثقافتی اور برادرانہ تعلقات کو مزید مستحکم بنانے اور پاکستان خواتین کو بااختیار بنانے کے لیے ترجیحی اقدامات کر رہا ہے، اعظم نذیر تارڑ کے عزم کے مطابق خواتین کے حقوق کے فروغ کے لیے مشترکہ اقدامات پر اتفاق کیا۔
او آئی سی کے پلیٹ فارم پر تعاون
ملاقات میں فلسطین اور افغانستان کی خواتین کو درپیش مسائل کو او آئی سی کے پلیٹ فارم پر مؤثر انداز میں اجاگر کرنے اور ان کی فلاح و بہبود کے لیے مشترکہ لائحہ عمل اختیار کرنے کی ضرورت پر زور دیا گیا۔ ڈاکٹر زہرہ بہروز آذر نے خواتین کے حوالے سے او آئی سی کی آئندہ دو سالہ وزارتی چیئرمین شپ سنبھالنے پر پاکستان کا خیرمقدم کرتے ہوئے خواتین کو بااختیار بنانے کے لیے پاکستان کے مؤثر کردار پر اپنے اعتماد کا اظہار کیا۔
