عالمی امن کے لیے پاکستان کا عزم برقرار، اقوام متحدہ کے امن مشنز میں پاکستانی خدمات کو خراجِ تحسین

اقوام متحدہ کے عالمی یومِ امن محافظین پر پاکستان کا پیغام، 2 لاکھ 37 ہزار سے زائد پاکستانی امن دستوں کی خدمات اور 183 شہداء کی قربانیوں کا اعتراف

راولپنڈی (دوست نیوز)

اقوام متحدہ کے عالمی یومِ امن محافظین 2026 کے موقع پر پاکستان نے دنیا بھر میں امن، استحکام اور انسانیت کی خدمت کے لیے اپنی جانوں کا نذرانہ پیش کرنے والے اقوام متحدہ کے امن دستوں (بلیو ہیلمٹس) کو شاندار خراجِ عقیدت پیش کیا ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ پاکستان گزشتہ چھ دہائیوں سے اقوام متحدہ کے امن مشنز میں فعال کردار ادا کر رہا ہے اور عالمی امن کے قیام کے لیے اس کی خدمات بین الاقوامی سطح پر تسلیم شدہ ہیں۔

بیان کے مطابق 1960 سے اب تک 2 لاکھ 37 ہزار سے زائد پاکستانی امن دستے دنیا کے مختلف خطوں میں اقوام متحدہ کے مشنز کے تحت خدمات انجام دے چکے ہیں، جبکہ 183 پاکستانی اہلکار عالمی امن کے لیے اپنی جانوں کا نذرانہ پیش کر چکے ہیں۔

پاکستانی بلیو ہیلمٹس اس وقت بھی دنیا کے حساس اور خطرناک علاقوں میں فرائض انجام دے رہے ہیں جن میں جمہوریہ کانگو میں اقوام متحدہ کا مشن (MONUSCO)، جنوبی سوڈان میں اقوام متحدہ کا مشن (UNMISS) اور وسطی افریقی جمہوریہ میں اقوام متحدہ کا مشن (MINUSCA) شامل ہیں۔ پاکستانی دستے ان مشنز میں فوجی کارروائیوں، شہریوں کے تحفظ، انسانی امداد اور موسمیاتی تبدیلیوں سے پیدا ہونے والے چیلنجز سے نمٹنے سمیت متعدد ذمہ داریاں نبھا رہے ہیں۔

آئی ایس پی آر کے مطابق موجودہ دور میں جنگوں اور تنازعات کی نوعیت مزید پیچیدہ، غیر متوازن اور خطرناک ہو چکی ہے۔ امن محافظین کو اب صرف روایتی سکیورٹی خطرات ہی نہیں بلکہ سائبر حملوں، ڈیجیٹل غلط معلومات، سیاسی عدم استحکام اور موسمیاتی تبدیلیوں سے جنم لینے والے انسانی بحرانوں کا بھی سامنا ہے۔

بیان میں کہا گیا کہ 2026 کا عالمی موضوع "امن میں سرمایہ کاری” (Invest in Peace) دراصل اس سوچ کی عکاسی کرتا ہے کہ تنازعات کے بعد ردعمل دینے کے بجائے پہلے سے امن کے قیام اور تحفظ کے لیے عملی اقدامات کیے جائیں۔ اس مقصد کے لیے جدید انٹیلی جنس نظام، شہریوں کے تحفظ کے مؤثر طریقہ کار اور موسمیاتی تبدیلیوں کے مطابق آپریشنل صلاحیتوں میں سرمایہ کاری ناگزیر ہے۔

پاکستانی حکومت اور مسلح افواج نے اقوام متحدہ کے امن مشنز کے مقاصد اور اصولوں کے ساتھ اپنی غیر متزلزل وابستگی کا اعادہ کرتے ہوئے کہا ہے کہ پاکستان انسانی وسائل، جدید تربیتی مراکز اور ادارہ جاتی صلاحیتوں میں مسلسل سرمایہ کاری کے ذریعے عالمی امن کے فروغ کے لیے اپنا کردار ادا کرتا رہے گا۔

بیان کے اختتام پر کہا گیا کہ پاکستان اقوام متحدہ کے شانہ بشانہ کھڑا ہے اور عالمی برادری کو یہ یاد دلاتا ہے کہ پائیدار امن خود بخود قائم نہیں رہتا بلکہ اس کے لیے مسلسل، اجتماعی اور سنجیدہ کوششوں کی ضرورت ہوتی ہے۔ پاکستان عالمی استحکام، سلامتی اور انسانی امداد کے لیے اقوام متحدہ کے پرچم تلے اپنی ذمہ داریاں نبھانے کے عزم پر قائم ہے

#پاکستان #اقوام_متحدہ #یوم_امن_محافظین #BlueHelmets #UNPeacekeeping #پاک_فوج #ISPR #عالمی_امن #امن_میں_سرمایہ_کاری #UNMISS #MONUSCO #MINUSCA #دوست_نیوز #PakistanArmy #UnitedNations