ڈیرہ اسماعیل خان میں سکیورٹی فورسز کا آپریشن، 6 بھارتی سرپرستی میں سرگرم دہشت گرد ہلاک، 2 جوان شہید
ڈیرہ اسماعیل خان میں سکیورٹی فورسز کا آپریشن، 6 بھارتی سرپرستی میں سرگرم دہشت گرد ہلاک، 2 جوان شہید
راولپنڈی: سکیورٹی فورسز نے ڈیرہ اسماعیل خان کے علاقے زرکانی میں انٹیلی جنس بنیادوں پر کارروائی کرتے ہوئے بھارتی سرپرستی میں سرگرم فتنہ الخوارج کے 6 دہشت گردوں کو ہلاک کر دیا، تاہم شدید فائرنگ کے تبادلے میں پاک فوج کے 2 جوان شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے 24 اکتوبر کو ڈیرہ اسماعیل خان کے علاقے زرکانی میں خوارج کی موجودگی کی اطلاع پر انٹیلی جنس بنیادوں پر آپریشن کیا۔ کارروائی کے دوران سکیورٹی فورسز نے مؤثر حکمت عملی کے تحت 6 بھارتی سرپرستی میں سرگرم خوارج کو ہلاک کر دیا۔
فائرنگ کے شدید تبادلے میں نائیک غلام مرتضیٰ (عمر 36 سال، ضلع گجرات کے رہائشی) اور سپاہی تاثیر احمد (عمر 30 سال، ضلع تلہ گنگ کے رہائشی) بہادری سے لڑتے ہوئے شہید ہو گئے۔
آئی ایس پی آر کے مطابق ہلاک خوارج کے قبضے سے اسلحہ اور گولہ بارود بھی برآمد ہوا۔ یہ دہشت گرد سکیورٹی فورسز، قانون نافذ کرنے والے اداروں اور بے گناہ شہریوں کے خلاف متعدد دہشت گردانہ کارروائیوں میں ملوث تھے۔
علاقے میں کسی بھی ممکنہ بھارتی سرپرستی میں سرگرم دہشت گرد کی موجودگی کے خاتمے کے لیے کلیئرنس آپریشن جاری ہے۔
آئی ایس پی آر کا کہنا ہے کہ وفاقی ایپکس کمیٹی کی جانب سے منظور کردہ قومی ایکشن پلان کے تحت وژن عزمِ استحکام کے تحت سکیورٹی فورسز اور قانون نافذ کرنے والے اداروں کی انسداد دہشت گردی مہم پوری رفتار سے جاری رہے گی تاکہ ملک سے بیرونی سرپرستی اور معاونت سے ہونے والی دہشت گردی کا مکمل خاتمہ کیا جا سکے۔ بیان میں کہا گیا ہے کہ وطن کے دفاع میں جوانوں کی قربانیاں ملک کے تحفظ کے عزم کو مزید مضبوط کرتی ہیں۔
