بنوں پولیس کا رورل II سرکل میں کامیاب انٹیلیجنس بیسڈ آپریشن
پشاور۔ 20 مئی (دوست نیوز):ڈی آئی جی بنوں ریجن سجاد خان کی خصوصی ہدایات اور ڈی پی او بنوں یاسر آفریدی کی سربراہی میں بدھ کو بنوں پولیس نے رورل II سرکل کے مختلف علاقوں میں شرپسند عناصر، جرائم پیشہ افراد اور ان کے سہولت کاروں کے خلاف انٹیلیجنس بیسڈ آپریشن کیا۔تر جمان بنوں پولیس کے مطابق ڈی ایس پی رورل II عباد وزیر کی نگرانی میں پولیس ٹیموں نے مختلف مقامات پر کارروائیاں کرتے ہوئے متعدد مشتبہ افراد کو حراست میں لے لیاجبکہ جرائم پیشہ عناصر کے ٹھکانوں سے دوران سرچ غیر قانونی اسلحہ بھی برآمد کر لیا گیا۔ یہ کامیاب کارروائیاں بنوں پولیس کے اس عزم کا واضح اظہار ہیں کہ ضلع میں امن و امان کو ہر صورت برقرار رکھا جائے گا اور عوام کے جان و مال کے تحفظ پر کوئی سمجھوتہ نہیں کیا جائے گا۔بنوں پولیس جرائم پیشہ عناصر، شرپسندوں اور ان کے سہولت کاروں کے گرد گھیرا مزید تنگ کرتے ہوئے شہریوں کو پُرامن اور محفوظ ماحول فراہم کرنے کے لیے شب و روز متحرک ہے۔
