عمران خان کی اسپتال منتقلی، پی ٹی آئی کی توہین عدالت درخواست پر رجسٹرار آفس کا اعتراض، دوبارہ دائر کردی گئی
عمران خان کی اسپتال منتقلی، پی ٹی آئی کی توہین عدالت درخواست پر رجسٹرار آفس کا اعتراض، دوبارہ دائر کردی گئی
اسلام آباد: سپریم کورٹ کے رجسٹرار آفس نے بانی پی ٹی آئی عمران خان کی اسپتال منتقلی سے متعلق پاکستان تحریک انصاف کی توہین عدالت کی درخواست پر اعتراض عائد کرکے اسے واپس کردیا۔
رجسٹرار آفس کی جانب سے اعتراض کیا گیا کہ درخواست میں جن افراد کو توہین عدالت کا مرتکب قرار دیا گیا ہے، ان کے خلاف عائد الزامات کی فہرست فراہم نہیں کی گئی۔
سپریم کورٹ کے باہر میڈیا سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ انہوں نے رجسٹرار سپریم کورٹ سے ملاقات کی، جہاں انہیں درخواست پر عائد اعتراض سے آگاہ کیا گیا۔ ان کا کہنا تھا کہ اعتراض دور کرکے درخواست آج ہی دوبارہ دائر کردی جائے گی۔
پی ٹی آئی نے عمران خان کو سپریم کورٹ کے 18 اگست کے حکم کے مطابق شفا انٹرنیشنل اسپتال منتقل نہ کیے جانے پر حکومت کے خلاف توہین عدالت کی کارروائی کی درخواست دائر کی تھی۔ پارٹی کا مؤقف ہے کہ عدالتی حکم پر مکمل عملدرآمد نہیں کیا گیا۔
دوسری جانب حکومت نے بھی عمران خان کی اسپتال منتقلی سے متعلق سپریم کورٹ کے 18 اگست کے فیصلے کے خلاف نظرثانی درخواست دوبارہ دائر کی ہے، جسے رجسٹرار آفس کے اعتراضات دور کرنے کے بعد نمبر 2033/2026 الاٹ کردیا گیا ہے۔
