ایس ایس پی آپریشنز اسلام آباد کی کھلی کچہری، شہریوں کی شکایات پر فوری کارروائی کے احکامات جاری
ایس ایس پی آپریشنز اسلام آباد کی کھلی کچہری، شہریوں کی شکایات پر فوری کارروائی کے احکامات جاری
اسلام آباد: ایس ایس پی آپریشنز اسلام آباد قاضی علی رضا نے اوپن ڈور پالیسی کے تحت کھلی کچہری کا انعقاد کیا، جہاں شہریوں کی شکایات سن کر ان کے فوری حل کے لیے متعلقہ افسران کو قانونی کارروائی مکمل کرکے مقررہ وقت میں رپورٹ پیش کرنے کی ہدایت کی گئی۔
اسلام آباد پولیس کے مطابق انسپکٹر جنرل آف پولیس اسلام آباد کے خصوصی احکامات کی روشنی میں ایس ایس پی آپریشنز قاضی علی رضا نے اپنے دفتر میں کھلی کچہری منعقد کی، جس میں شہریوں نے اپنے مسائل اور شکایات پیش کیں۔
ایس ایس پی آپریشنز نے شہریوں کی شکایات سننے کے بعد متعلقہ افسران کو درخواستیں بھجواتے ہوئے ہدایت کی کہ ان پر میرٹ اور قانون کے مطابق کارروائی کی جائے اور مقررہ وقت میں رپورٹ پیش کی جائے تاکہ شہریوں کے مسائل کا بروقت ازالہ یقینی بنایا جا سکے۔
قاضی علی رضا نے کہا کہ شہریوں کو ہر ممکن ریلیف فراہم کرنا اسلام آباد پولیس کی اولین ترجیح ہے۔ خواتین اور بچوں پر تشدد کے حوالے سے زیرو ٹالرنس پالیسی پر عمل کیا جا رہا ہے اور قانون کی بالادستی ہر صورت یقینی بنائی جائے گی۔
انہوں نے کہا کہ تمام شہریوں کو مساوی حقوق حاصل ہیں اور ہر درخواست پر میرٹ کے مطابق فیصلہ کیا جائے گا۔ شہریوں کی جان، مال اور عزتِ نفس کا تحفظ پولیس کی بنیادی ذمہ داری ہے۔
اسلام آباد پولیس کے مطابق عوامی مسائل کے حل اور شہریوں کو بروقت انصاف کی فراہمی کے لیے کھلی کچہریوں اور اوپن ڈور پالیسی کے تحت اقدامات جاری رکھے جائیں گے۔
