وزیراعظم شہباز شریف نے اسلام آباد میں دانش آئی ٹی پارک کا افتتاح کر دیا

اسلام آباد (نمائندہ خصوصی)۔ وزیراعظم محمد شہباز شریف نے اسلام آباد آئی ٹی پارک کا نام ’دانش آئی ٹی پارک‘ رکھنے کا اعلان کرتے ہوئے کہا ہے کہ یہ منصوبہ پاکستان میں مصنوعی ذہانت (اے آئی) اور انفارمیشن ٹیکنالوجی کے شعبوں میں نوجوانوں کو ہنرمند بنانے، جدت کے فروغ اور ملک کی ترقی و خوشحالی میں سنگ میل ثابت ہوگا۔ ان خیالات کا اظہار انہوں نے اسلام آباد میں نیشنل ٹیکنالوجی پارک کی افتتاحی تقریب سے خطاب کرتے ہوئے کیا۔ تقریب میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر آئی ٹی شزا فاطمہ خواجہ، وفاقی وزیر اطلاعات و نشریات عطا تارڑ اور وفاقی وزیر منصوبہ بندی احسن اقبال سمیت وفاقی کابینہ کے ارکان، پارلیمینٹیرینز، جنوبی کوریا کے سفیر، معروف آئی ٹی کمپنیوں کے سربراہان اور آئی ٹی ماہرین نے شرکت کی۔

دانش آئی ٹی پارک نوجوانوں کے لیے مواقع کا مرکز

تقریب سے خطاب کرتے ہوئے وزیراعظم نے کہا کہ یہ جدید آئی ٹی پارک انکیوبیشن سینٹرز، انوویشن، اسٹارٹ اپس، چھوٹے اور درمیانے درجے کے کاروبار، صنعتوں اور نوجوان کاروباری افراد کے لیے مواقع فراہم کرے گا۔ انہوں نے مزید کہا کہ آج کل امریکی تعلیمی نظام کے لیے خطرے کی گھنٹی کے پیش نظر ہمیں اپنے تعلیمی اور تکنیکی ڈھانچے کو جدید خطوط پر استوار کرنا ہوگا، اس سے ملک کے ہزاروں نہیں بلکہ لاکھوں نوجوان مرد و خواتین کو ہنر سیکھنے اور بااختیار بننے کا موقع ملے گا جبکہ یہی مہارتیں پاکستان کو ترقی یافتہ ممالک کی صف میں شامل کرنے میں مدد دیں گی۔ انہوں نے کہا کہ جب یہ آئی ٹی پارک مکمل طور پر فعال ہوجائے گا تو انہیں یقین ہے کہ اس طرز کے درجنوں اور سینکڑوں نہیں بلکہ ہزاروں آئی ٹی پارکس ملک کے چاروں صوبوں میں قائم ہوں گے۔ مصنوعی ذہانت اور انفارمیشن ٹیکنالوجی کی مدد سے زراعت، صنعت، مینوفیکچرنگ، معدنیات اور دیگر شعبوں میں جدید علوم سے استفادہ کیا جاسکے گا۔

منصوبے کی تکمیل: سیاسی پوائنٹ سکورنگ سے بالاتر

وزیراعظم نے کہا کہ اسلام آباد آئی ٹی پارک کے منصوبے کا سنگ بنیاد 18-2017 میں رکھا گیا تھا، تاہم اس کے بعد کیا ہوا وہ تاریخ کا حصہ ہے۔ انہوں نے کہا کہ یہ سیاسی پوائنٹ سکورنگ کا موقع نہیں، بلکہ منصوبے کی تکمیل میں تعاون کرنے والے تمام افراد کی کاوشوں کو سراہنے کا موقع ہے۔ انہوں نے حکومت کے متعلقہ وزرا بالخصوص وزیر خزانہ اور وزیر آئی ٹی سمیت ان کی پوری ٹیم کی محنت کو سراہا۔ انہوں نے بتایا کہ ابتدا میں اس منصوبے کو ناقابل عمل منصوبہ قرار دیا گیا تھا لیکن ٹیم ورک اور دن رات کی محنت سے اسے ایک مستحکم اور قابل عمل منصوبے میں تبدیل کردیا گیا۔

جنوبی کوریا کے ساتھ دیرینہ تعلقات اور تکنیکی تعاون

تقریب میں موجود جنوبی کوریا کے سفیر سے مخاطب ہوتے ہوئے وزیراعظم نے دوطرفہ تعلقات کا ذکر کیا۔ انہوں نے کہا کہ جنوبی کوریا کا اس منصوبے میں تعاون قابل قدر ہے۔ انہوں نے یقین دلایا کہ پاکستان اس منصوبے کی دیکھ بھال کرے گا اور اسے اس شعبے میں ایک کامیاب منصوبہ بنایا جائے گا۔

دانش آئی ٹی پارک: مستقبل کا وژن

وزیراعظم نے کہا کہ آئی ٹی پارک کی اہمیت صرف عمارت تک محدود نہیں بلکہ اس کا اصل مقصد ایک ایسا نظام تشکیل دینا ہے جس میں جدت، انکیوبیشن سینٹرز، ہنر کی ترقی، فنی تربیت اور کاروباری افراد کو آئی ٹی اور مصنوعی ذہانت کے ماہرین سے سیکھنے کے مواقع میسر آئیں۔ انہوں نے بتایا کہ انہوں نے ہدایت کی ہے کہ عمارت کو شفاف طریقہ کار کے تحت چلانے کے لیے ملکی اور غیر ملکی کمپنیوں کو مدعو کیا جائے۔ وزیراعظم نے مزید کہا کہ دانش آئی ٹی پارک ملک کا پہلا ایسا آئی ٹی پارک ہوگا جسے حکومت پاکستان دوسرے صوبوں کے علاوہ آزاد جموں و کشمیر اور گلگت بلتستان تک بھی وسعت دے گی۔ انہوں نے دانش اسکولوں کا حوالہ دیتے ہوئے کہا کہ یہ ادارے انتہائی غربت کے ماحول میں رہنے والے بچوں کو تعلیم کے مواقع فراہم کر رہے ہیں اور یہی وژن دانش آئی ٹی پارک کی بنیاد ہے۔