نیشنل ویمنز انڈر 19 ٹورنامنٹ کی ٹرافی کی رونمائی، پانچوں ٹیموں کی کپتانوں نے شرکت کی
نیشنل ویمنز انڈر 19 ٹورنامنٹ کی ٹرافی کی رونمائی، پانچوں ٹیموں کی کپتانوں نے شرکت کی
کراچی: نیشنل ویمنز انڈر 19 ٹورنامنٹ کی ٹرافی کی رونمائی حنیف محمد ہائی پرفارمنس سنٹر کراچی میں منعقدہ تقریب میں کردی گئی، جس میں ٹورنامنٹ میں حصہ لینے والی پانچوں ٹیموں کی کپتانوں نے شرکت کی۔
ٹرافی کی رونمائی کی تقریب میں فضہ فیاض، کومل خان، سمیہ افسر، رویل فرحان اور ضوفشاں ایاز نے شرکت کی اور ٹورنامنٹ کے آغاز سے قبل ٹرافی کے ہمراہ تصاویر بھی بنوائیں۔
نیشنل ویمنز انڈر 19 ٹورنامنٹ کا باقاعدہ آغاز کل سے کراچی میں ہوگا، جہاں ایچ پی سی اوول گراؤنڈ اور این بی پی کمپلیکس میں میچز کھیلے جائیں گے۔ ٹورنامنٹ میں نوجوان خواتین کرکٹرز کو اپنی صلاحیتوں کے اظہار اور اعلیٰ سطح کی مسابقتی کرکٹ کا تجربہ حاصل کرنے کا موقع ملے گا۔
ٹورنامنٹ کے دوران مجموعی طور پر 21 میچز کھیلے جائیں گے۔ ایونٹ کے پہلے 10 میچز 30 اوورز فی اننگز کے فارمیٹ میں ہوں گے، جبکہ باقی 11 میچز ٹی ٹوئنٹی فارمیٹ کے تحت کھیلے جائیں گے۔
منتظمین کے مطابق مختلف فارمیٹس میں میچز کے انعقاد کا مقصد نوجوان کھلاڑیوں کو محدود اوورز کی مختلف طرز کی کرکٹ سے روشناس کرانا اور انہیں مستقبل میں قومی سطح کی نمائندگی کے لیے تیار کرنا ہے۔
ٹورنامنٹ میں شریک پانچوں ٹیموں کی کپتانیں اپنی اپنی ٹیموں کی قیادت کریں گی اور ایونٹ کے دوران نوجوان کھلاڑیوں کی کارکردگی پر خصوصی توجہ مرکوز رہے گی۔
کراچی میں ہونے والا نیشنل ویمنز انڈر 19 ٹورنامنٹ پاکستان میں خواتین کی کرکٹ کے فروغ اور نوجوان ٹیلنٹ کو سامنے لانے کے لیے اہم قدم قرار دیا جا رہا ہے۔ ٹورنامنٹ کے دوران کھلاڑیوں کو اپنی بیٹنگ، بولنگ اور فیلڈنگ کی صلاحیتوں کا مظاہرہ کرنے کا موقع ملے گا، جبکہ بہترین کارکردگی دکھانے والی کھلاڑیوں کے لیے مستقبل میں اعلیٰ سطح کی کرکٹ کے دروازے کھل سکتے ہیں۔
ٹرافی کی رونمائی کے ساتھ ہی ٹورنامنٹ کے باقاعدہ آغاز کی تیاریاں مکمل کرلی گئی ہیں اور شائقین کی نظریں اب کراچی کے دونوں میدانوں میں ہونے والے ابتدائی میچز پر مرکوز ہیں۔
