پاکستان کواس وقت سب سے زیادہ اتحاد اورقومی یکجہتی کی ضرورت ہے ، گورنرخیبرپختونخوا فیصل کریم کنڈی

پشاور۔ 16 مئی (دوست نیوز):پشاور، گورنرخیبرپختونخوا فیصل کریم کنڈی نے کہا ہے کہ’’ بنیانِ مرصوص ‘‘اتحاد، نظم و ضبط اور قومی قوت کی علامت ہے اورپاکستان کو اس وقت سب سے زیادہ اتحاد اورقومی یکجہتی کی ضرورت ہے، استحکامِ پاکستان صرف عسکری طاقت سے نہیں بلکہ سیاسی اورمعاشی استحکام سے بھی جڑا ہوا ہے۔ انہوں نے ان خیالات کا اظہار گورنر ہاؤس پشاورمیں منعقدہ ’’بنیان مرصوص ‘‘اوراستحکام پاکستان کانفرنس سے خطاب کرتے ہوئے کیا۔ کانفرنس میں ملک بھرسے علماء کرام، سیاسی و سماجی رہنماؤں نے شرکت کی۔

گورنر نے کہا کہ دشمن قوتیں سوشل میڈیا کے ذریعے نفرت اورتقسیم کو فروغ دینے کی کوشش کر رہی ہیں تاہم قومی بیانیے کو مضبوط بنا کراور نوجوان نسل کو مثبت سوچ دے کران سازشوں کا مقابلہ کیا جا سکتا ہے۔ انہوں نے کہا کہ نوجوانوں کو تعلیم، روزگاراورٹیکنالوجی کے بہترمواقع فراہم کرنا وقت کی اہم ضرورت ہے، خیبرپختونخوا کے عوام نے دہشت گردی کے خلاف بے مثال قربانیاں دی ہیں اورشہداء کی قربانیوں کی بدولت آج پاکستان قائم و دائم ہے۔

انہوں نے شہداء کو خراجِ تحسین پیش کرتے ہوئے کہا کہ سیاسی استحکام، آئین کی بالادستی اورقومی ہم آہنگی ملکی ترقی کی ضمانت ہیں، تمام اختلافات سے بالاتر ہو کر پاکستان کے مفاد کو ترجیح دینا ہوگی اورنفرت کے بجائے محبت، بھائی چارے اوراتحاد کو فروغ دینا ہوگا۔ گورنر نے اس موقع پرکہا کہ شہید مولانا محمد ادریس کانام سول ایوارڈ کیلئے نامزد کرنیکی سفارش کی جائیگی۔

ان کا کہنا تھا کہ مضبوط، پرامن اورخوشحال پاکستان کے لیے ہر فرد کو اپنا کردارادا کرنا ہوگا۔ گورنر نے کہا کہ پاکستان نے ایک سال قبل بھارت کو جنگ اورسفارتی محاذ پر شکست دی جبکہ آج دنیا بھرمیں پاکستانیوں کی قدرکی جاتی ہے، کانفرنس سے پیرعبد القدوس ، خواجہ نورمحمد سہو ، پیرفیضان اعظم ، آرگنائزر اسامہ اجمل قاسمی ، مفتی اویس بٹ اوردیگرعلماء و مشائخ نے بھی خطاب کیا ۔