اسلام آباد میں گھریلو چوری کی متعدد وارداتوں میں ملوث سابقہ ریکارڈ یافتہ ملزم گرفتار، نقدی اور اسلحہ برآمد
اسلام آباد میں گھریلو چوری کی متعدد وارداتوں میں ملوث سابقہ ریکارڈ یافتہ ملزم گرفتار، نقدی اور اسلحہ برآمد
اسلام آباد: شالیمار پولیس نے گھریلو چوری کی متعدد وارداتوں میں ملوث سابقہ ریکارڈ یافتہ منظم گروہ کے اہم رکن کو گرفتار کر کے اس کے قبضے سے مسروقہ نقدی اور وارداتوں میں استعمال ہونے والا اسلحہ معہ ایمونیشن برآمد کر لیا۔
اسلام آباد پولیس کے مطابق تھانہ شالیمار کی ٹیم نے کارروائی کرتے ہوئے گھریلو چوری کی متعدد وارداتوں میں ملوث گروہ کے اہم رکن کو گرفتار کیا۔ ملزم کے قبضے سے چوری کی گئی نقدی اور وارداتوں میں استعمال ہونے والا اسلحہ اور گولیاں برآمد ہوئی ہیں۔ ملزم کے خلاف مقدمات درج ہیں جبکہ مزید تفتیش جاری ہے۔
ایس ایس پی آپریشنز اسلام آباد قاضی علی رضا کی خصوصی ہدایات پر وفاقی دارالحکومت میں چوری، ڈکیتی، راہزنی اور دیگر سنگین جرائم میں ملوث ملزمان کی گرفتاری اور جرائم کی روک تھام کے لیے کریک ڈاؤن جاری ہے۔
ایس ایس پی آپریشنز نے تمام متعلقہ افسران کو ہدایت کی ہے کہ شہریوں کو ان کے قیمتی اثاثوں سے محروم کرنے والے جرائم پیشہ عناصر کے خلاف کارروائیاں تیز کی جائیں اور ان کی گرفتاری یقینی بنائی جائے۔
اسلام آباد پولیس نے شہریوں سے اپیل کی ہے کہ جرائم کے خاتمے کے لیے پولیس سے تعاون کریں اور کسی بھی مشکوک سرگرمی یا شخص کے بارے میں فوری طور پر متعلقہ تھانے یا ایمرجنسی ہیلپ لائن 15 پر اطلاع دیں۔
