یو بی جی کا ایف پی سی سی آئی کی آئندہ صدارت کے لیے ایس ایم تنویر کے نام پر اتفاقِ رائے، انتخابی اتحاد کے لیے کمیٹی قائم

یو بی جی کا ایف پی سی سی آئی کی آئندہ صدارت کے لیے ایس ایم تنویر کے نام پر اتفاقِ رائے، انتخابی اتحاد کے لیے کمیٹی قائم

اسلام آباد: یونائیٹڈ بزنس گروپ (یو بی جی) نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کی آئندہ صدارت کے لیے گروپ کے سرپرستِ اعلیٰ ایس ایم تنویر کے نام کی متفقہ منظوری دے دی۔ اس سلسلے میں منعقدہ اجلاس میں سیکرٹری جنرل یو بی جی ظفر بختاوری کی جانب سے پیش کردہ قرارداد تمام ارکان نے متفقہ طور پر منظور کر لی، جبکہ اجلاس میں بعض ارکان نے ویڈیو لنک کے ذریعے بھی شرکت کی۔ شرکاء نے ہاتھ اٹھا کر ایس ایم تنویر کی نامزدگی کی توثیق کی۔

اجلاس میں یو بی جی رہنماؤں نے ایس ایم تنویر کی نامزدگی کو کاروباری برادری کے اتحاد، اعتماد اور مضبوط قیادت کا مظہر قرار دیتے ہوئے کہا کہ ان کا تجربہ اور کاروباری بصیرت ایف پی سی سی آئی کو مزید فعال اور مؤثر بنانے میں اہم کردار ادا کر سکتی ہے۔

یو بی جی کے سیکرٹری جنرل ظفر بختاوری نے کہا کہ ایس ایم تنویر کاروباری برادری کی ایک مؤثر آواز ہیں اور ان کی قیادت میں تاجروں اور صنعت کاروں کے مسائل بھرپور انداز میں اجاگر کیے جائیں گے۔

غلام فاروق نے کہا کہ ایس ایم تنویر کی نامزدگی کاروباری برادری کے وسیع تر مفاد میں ایک بہترین فیصلہ ہے اور انہیں ان کی صلاحیتوں پر مکمل اعتماد ہے۔

خالد تواب نے کہا کہ ایس ایم تنویر کا تجربہ اور کاروباری بصیرت ایف پی سی سی آئی کو مزید فعال اور مؤثر بنانے میں اہم کردار ادا کرے گی، جبکہ عبدالرؤف عالم نے کہا کہ ان کی متفقہ نامزدگی گروپ کے اتحاد اور قیادت پر بھرپور اعتماد کا واضح ثبوت ہے۔

حنیف گوہر نے کہا کہ ایس ایم تنویر کاروباری برادری کو درپیش مسائل اور معاشی چیلنجز سے بخوبی آگاہ ہیں اور وہ تاجر برادری کی مؤثر نمائندگی کریں گے۔ عامر عطا باجوہ نے کہا کہ ان کی قیادت میں کاروباری برادری کے اتحاد کو مزید مضبوط بنانے اور ملکی معیشت کے استحکام کے لیے مؤثر کوششیں کی جا سکیں گی۔

مومن علی ملک نے کہا کہ ایس ایم تنویر کی نامزدگی کاروباری برادری کی امیدوں کی ترجمان ہے اور ان کی قیادت میں ایف پی سی سی آئی کا کردار مزید مضبوط ہوگا۔ زبیر طفیل نے بھی ایس ایم تنویر کو تجربہ کار اور متحرک کاروباری رہنما قرار دیتے ہوئے کہا کہ ان کی نامزدگی پر اتفاقِ رائے یو بی جی کے ان پر مضبوط اعتماد کی عکاسی کرتا ہے۔

اجلاس میں ایف پی سی سی آئی کے آئندہ انتخابات کے لیے مختلف گروپس اور امیدواروں سے رابطوں اور انتخابی اتحاد کی تشکیل کے لیے ایک کمیٹی بھی قائم کی گئی۔ کمیٹی میں زبیر طفیل، خالد تواب، عبدالرؤف عالم، ظفر بختاوری، عامر عطا باجوہ، غلام فاروق، غضنفر بلور، ثمینہ فاضل، حنیف گوہر، ذکی اعجاز اور علی حسام اصغر شامل ہیں۔

اجلاس میں زبیر طفیل، احسن بختاوری، شیخ ریاض الدین، ثمینہ فاضل، جواد کاظمی، زاہد اقبال چوہدری، غضنفر بلور، نعمان بٹ، حاجی عطاالرحمن، حاجی افتخار، میاں رحمن عزیز چن، میاں ظفر اقبال، قرۃ العین، رؤف مختار، ذکی اعجاز، دارو خان، شبنم ظفر، طارق محمود، سید مظہر علی، میاں زاہد حسین اور علی حسام اصغر سمیت دیگر کاروباری رہنماؤں نے شرکت کی۔

یو بی جی کی جانب سے ایس ایم تنویر کی نامزدگی کی متفقہ منظوری اور انتخابی اتحاد کے لیے کمیٹی کا قیام ایف پی سی سی آئی کے آئندہ انتخابات کے حوالے سے گروپ کی سیاسی و انتخابی سرگرمیوں میں اہم پیش رفت ہے۔