پنجاب میں گاڑیوں کے فٹنس سرٹیفکیٹ کی ڈیڈ لائن میں ایک ماہ کی توسیع
پنجاب میں گاڑیوں کے فٹنس سرٹیفکیٹ کی ڈیڈ لائن میں ایک ماہ کی توسیع
لاہور: پنجاب حکومت نے نجی گاڑیوں کے فٹنس سرٹیفکیٹ حاصل کرنے کی آخری تاریخ میں ایک ماہ کی توسیع کرتے ہوئے نئی ڈیڈ لائن 15 نومبر 2026 مقرر کر دی ہے۔ بعض نجی گاڑیوں کو انجن کی گنجائش کے مطابق تیاری کے سال سے پانچ سے سات سال تک فٹنس سرٹیفکیٹ کی شرط سے استثنیٰ بھی دیا گیا ہے۔
نئے فیصلے کے مطابق ایک ہزار سی سی تک کی گاڑیوں کو تیاری کے سال سے پانچ سال، 1001 سے 2000 سی سی تک کی گاڑیوں کو چھ سال، جبکہ 2000 سی سی سے زیادہ انجن کی گنجائش والی گاڑیوں کو سات سال تک فٹنس سرٹیفکیٹ کی شرط سے استثنیٰ حاصل ہوگا۔
یہ فیصلہ صوبائی موٹر وہیکلز آرڈیننس 1965 کے تحت کیا گیا ہے، جس کا مقصد نجی گاڑیوں کے مالکان کو فٹنس سرٹیفکیٹ کے حصول کے لیے اضافی مہلت فراہم کرنا ہے۔
جن گاڑیوں پر فٹنس سرٹیفکیٹ کی شرط لاگو ہوتی ہے، ان کے مالکان کو مقررہ تاریخ تک سرٹیفکیٹ حاصل کرنا ہوگا۔ ڈیڈ لائن گزرنے کے بعد قواعد کی خلاف ورزی کرنے والی گاڑیوں کے خلاف کارروائی کی جا سکتی ہے۔
گاڑی مالکان کو ہدایت کی گئی ہے کہ وہ اپنی گاڑی کی انجن گنجائش، تیاری کے سال اور متعلقہ قواعد کے مطابق فٹنس سرٹیفکیٹ کی ضرورت کی تصدیق کریں تاکہ ممکنہ قانونی کارروائی سے بچا جا سکے۔
