بلاول بھٹو زرداری اور رانا ثناء اللہ جوڈیشل کمیشن آف پاکستان کے حکومتی ارکان مقرر
بلاول بھٹو زرداری اور رانا ثناء اللہ جوڈیشل کمیشن آف پاکستان کے حکومتی ارکان مقرر
اسلام آباد: پاکستان پیپلز پارٹی کے چیئرمین بلاول بھٹو زرداری اور مسلم لیگ (ن) کے رہنما رانا ثناء اللہ کو جوڈیشل کمیشن آف پاکستان کے حکومتی ارکان مقرر کر دیا گیا ہے، جبکہ تقرریوں کا نوٹیفکیشن بھی جاری کر دیا گیا ہے۔
ذرائع کے مطابق چیف جسٹس آف پاکستان جسٹس یحییٰ آفریدی کی منظوری کے بعد بلاول بھٹو زرداری اور رانا ثناء اللہ کی تقرریوں کا نوٹیفکیشن جاری کیا گیا۔ دونوں رہنما حکومتی ارکان کی حیثیت سے جوڈیشل کمیشن میں اپنی جماعتوں کی نمائندگی کریں گے۔
بلاول بھٹو زرداری پاکستان پیپلز پارٹی جبکہ رانا ثناء اللہ مسلم لیگ (ن) کی جانب سے کمیشن کا حصہ ہوں گے۔
اس سے قبل پاکستان پیپلز پارٹی کے فاروق ایچ نائیک اور مسلم لیگ (ن) کے آفتاب شیخ نے جوڈیشل کمیشن آف پاکستان کی رکنیت سے استعفیٰ دے دیا تھا، جس کے بعد دونوں جماعتوں کی جانب سے نئے ارکان کی نامزدگی عمل میں آئی۔
جوڈیشل کمیشن آف پاکستان عدلیہ میں اعلیٰ سطح کی تقرریوں اور آئینی طریقہ کار کے تحت متعلقہ امور میں اہم کردار ادا کرتا ہے۔ نئے ارکان کی شمولیت سے کمیشن میں حکومتی نمائندگی میں تبدیلی آئی ہے۔
