نائب وزیراعظم اسحاق ڈار کی لندن میں برطانوی پارلیمنٹیرینز سے ملاقات

لندن (نمائندہ خصوصی)۔ نائب وزیراعظم و وزیر خارجہ سینیٹر محمد اسحاق ڈار نے لندن میں پاکستان ہاؤس میں پاکستانی نژاد برطانوی پارلیمنٹیرینز کے ایک بین الجماعتی گروپ سے اہم ملاقات کی۔ اس موقع پر اسحاق ڈار کی پاکستان نژاد برطانوی ارکان پارلیمنٹ سے ملاقات، پاک برطانیہ تعلقات اور مشرق وسطیٰ کی صورتحال پر تبادلہ خیال ہوا، جس میں دوطرفہ تعلقات کو مزید مستحکم بنانے پر زور دیا گیا۔

وفد میں شامل اہم شخصیات

دفتر خارجہ کے جاری کردہ بیان کے مطابق وفد میں لارڈ ضمیر چوہدری، لارڈ قربان حسین، بیرونس شائستہ شیہان اور لارڈ شفق محمد کے علاوہ اراکینِ پارلیمنٹ محمد یاسین، یاسمین قریشی، افضل خان، زبیر احمد اور عدنان حسین شامل تھے۔ نائب وزیراعظم نے پاکستان اور برطانیہ کے تعلقات کو مضبوط بنانے میں برطانوی پارلیمنٹیرینز کے اہم کردار اور تنازعہ جموں و کشمیر کے منصفانہ حل کے لیے ان کی بھرپور حمایت کو سراہا۔

مشرق وسطیٰ کی صورتحال اور پاکستان کا کردار

برطانوی ارکانِ پارلیمنٹ نے مشرقِ وسطیٰ میں پاکستان کی قیادت اور ثالثی کی کوششوں کو سراہتے ہوئے کہا کہ پاکستان کے تاریخی کردار کو عالمی سطح پر تسلیم کیا گیا ہے جس سے بیرونِ ملک مقیم تمام پاکستانیوں کا سر فخر سے بلند ہوا ہے۔ نائب وزیراعظم نے مشرقِ وسطیٰ میں کشیدگی میں کمی اور قیامِ امن کے لیے پاکستان کے جاری سفارتی اقدامات سے آگاہ کیا۔ انہوں نے کہا کہ پائیدار امن اور خطے میں استحکام کے حصول کے لیے تمام فریقین کی جانب سے اسلام آباد مفاہمتی یادداشت کی پاسداری نہایت اہم ہے۔ نائب وزیراعظم نے علاقائی امن و استحکام کے فروغ میں مکہ مکرمہ مشترکہ دفاعی معاہدے کی اہمیت کو بھی اجاگر کیا۔ انہوں نے واضح کیا کہ یہ معاہدہ مکمل طور پر دفاعی نوعیت کا ہے۔

آزاد جموں و کشمیر کے انتخابات پر گفتگو

آزاد جموں و کشمیر کی حالیہ صورتحال پر گفتگو کرتے ہوئے برطانوی پارلیمنٹیرینز نے حالیہ قانون ساز اسمبلی کے انتخابات میں پاکستان مسلم لیگ (ن) کی کامیابی پر نائب وزیراعظم و وزیر خارجہ کو مبارکباد دی۔ نائب وزیراعظم نے کہا کہ آزاد جموں و کشمیر کے عوام نے ماضی میں اقتصادی ترقی اور تعمیر و ترقی کے حوالے سے مسلم لیگ (ن) کی کارکردگی کی بنیاد پر اس پر اپنے اعتماد کا اظہار کیا ہے۔ انہوں نے کہا کہ نئی حکومت آزاد جموں و کشمیر میں بنیادی ڈھانچے میں سرمایہ کاری اور نوجوانوں کے لیے روزگار کے مواقع پیدا کرنے کو ترجیح دے گی۔ وفاقی حکومت اور آزاد جموں و کشمیر کی حکومت دیگر سیاسی جماعتوں اور متعلقہ فریقین کے ساتھ مل کر اہم حکومتی اور آئینی امور پر اتفاقِ رائے پیدا کرنے کے لیے کام کریں گی۔ آخر میں، پارلیمنٹیرینز نے باہمی دلچسپی کے دیگر امور پر بھی اپنے خیالات کا اظہار کیا اور پاکستان اور برطانیہ کے درمیان تعلقات کو مزید مضبوط بنانے کے عزم کا اعادہ کیا۔