چینی پی ایچ ڈی اسکالر کا کامسیٹس یونیورسٹی میں ڈاکٹریٹ مقالے کا کامیاب دفاع
چینی پی ایچ ڈی اسکالر کا کامسیٹس یونیورسٹی میں ڈاکٹریٹ مقالے کا کامیاب دفاع
نمائندہ خصوصی
اسلام آباد، اگست 2026: کامسیٹس یونیورسٹی اسلام آباد (CUI) کے ایبٹ آباد کیمپس کے شعبہ کمپیوٹر سائنس سے وابستہ چینی پی ایچ ڈی اسکالر ما ینگ ہوا نے آن لائن ڈاکٹریٹ امتحان کے ذریعے اپنے پی ایچ ڈی مقالے کا کامیابی سے دفاع کرلیا۔
مقالے کا دفاع یونیورسٹی کے مقررہ امتحانی ضوابط کے مطابق کیا گیا، جس میں یونیورسٹی کے سینئر حکام اور ملکی و بین الاقوامی ممتحنین پر مشتمل امتحانی پینل نے شرکت کی۔ اس موقع پر کامسیٹس یونیورسٹی اسلام آباد کے ریکٹر پروفیسر ڈاکٹر راحیل قمر، کنٹرولر امتحانات، چیئرپرسن شعبہ کمپیوٹر سائنس اور ڈین فیکلٹی آف انفارمیشن سائنس اینڈ ٹیکنالوجی بھی موجود تھے۔
امتحانی پینل میں قائداعظم یونیورسٹی، پاک آسٹریا فاخ ہوخ شُولے: انسٹی ٹیوٹ آف اپلائیڈ سائنسز اینڈ ٹیکنالوجی (PAF-IAST)، ایڈتھ کووان یونیورسٹی آسٹریلیا اور پولی ٹیکنیکو دی ٹورینو اٹلی کے ممتاز قومی و بین الاقوامی ماہرین شامل تھے۔
ما ینگ ہوا کے پی ایچ ڈی مقالے کا عنوان “A Deep Manifold Learning for Multi-Omics Data Integration and Analysis” تھا، جس کی نگرانی کامسیٹس یونیورسٹی اسلام آباد ایبٹ آباد کیمپس کے شعبہ کمپیوٹر سائنس کے ایسوسی ایٹ پروفیسر ڈاکٹر احمد خان نے کی۔
تحقیق میں کینسر کی تشخیص اور علاج کے لیے جینومکس، ٹرانسکرپٹومکس اور پروٹیومکس سمیت مختلف اقسام کے حیاتیاتی ڈیٹا کو یکجا کرکے ان کا تجزیہ کیا گیا۔ اس مقصد کے لیے ڈیپ مینی فولڈ لرننگ کی جدید تکنیک استعمال کی گئی، جس سے مختلف حیاتیاتی معلومات کے باہمی تعلق کو سمجھنے میں مدد ملتی ہے۔
تحقیق کے نتائج کینسر کی تشخیص، مرض کی درجہ بندی، بیماری کی پیش گوئی اور زیادہ مؤثر علاج کی تیاری میں معاون ثابت ہوسکتے ہیں۔
دفاع کے دوران اسکالر نے امتحانی پینل کے سامنے اپنی تحقیق، طریقۂ کار اور نتائج پیش کیے اور ممتحنین کی جانب سے تحقیق کی علمی اہمیت اور طریقۂ کار سے متعلق سوالات کے جوابات دیے۔
کامسیٹس یونیورسٹی کے مطابق پی ایچ ڈی مقالے کا کامیاب دفاع یونیورسٹی کے اعلیٰ تعلیمی اور تحقیقی معیار کی عکاسی کرتا ہے اور ملکی و بین الاقوامی ماہرین کی علمی و تحقیقی شمولیت کے حوالے سے یونیورسٹی کے عزم کو ظاہر کرتا ہے۔
