قاہرہ میں پاکستان، مصر، سعودی عرب اور ترکیہ کے وزرائے خارجہ کا اہم اجلاس
قاہرہ (نمائندہ خصوصی)۔ مصر کے دارالحکومت قاہرہ میں چار ملکی وزرائے خارجہ اجلاس محدود نشست کے ساتھ شروع ہو گیا ہے جس میں پاکستان، مصر، سعودی عرب اور ترکیہ کے وزرائے خارجہ شریک ہیں۔ دفتر خارجہ سے اتوار کو جاری ہونے والے بیان کے مطابق، اس اہم اجلاس میں شریک ممالک کے وزرائے خارجہ نے خطے کی موجودہ صورتحال، اسلام آباد میں طے پانے والی مفاہمتی یادداشت پر عملدرآمد اور باہمی تعاون کے لیے ترجیحی شعبوں پر تفصیلی غور و خوض کیا۔
اجلاس کے شرکاء نے خطے کو درپیش مشترکہ چیلنجز سے نمٹنے کے لیے مکالمے، سفارت کاری اور علاقائی قیادت کے اصولوں سے اپنی وابستگی کو ایک بار پھر دہرایا۔ اس موقع پر وزرائے خارجہ نے اس عزم کا اظہار کیا کہ پاکستان، سعودی عرب، ترکیہ اور مصر خطے میں امن، استحکام اور باہمی رابطوں کو فروغ دینے کے لیے اپنے تعاون کو مزید مضبوط بنائیں گے۔ یہ اجلاس خطے کے چار اہم ممالک کے درمیان تعلقات کو مستحکم کرنے اور مشترکہ مفادات کے حصول کے لیے ایک اہم قدم ہے۔
