حکومت کا پیٹرولیم قیمتوں کے تعین کیلئے نیا ہفتہ وار فارمولا لانے کا اعلان
اسلام آباد: وفاقی وزیر پیٹرولیم علی پرویز ملک نے کہا ہے کہ وزیراعظم، فیلڈ مارشل، وزیر خارجہ اور وزیر داخلہ کی سفارتی کاوشیں رنگ لا رہی ہیں اور ایران و امریکہ جنگ بندی معاہدے کی جانب پیش رفت کر رہے ہیں، جس کے مثبت اثرات عالمی توانائی منڈیوں پر بھی نمایاں ہونا شروع ہو گئے ہیں۔
ایکس پر اپنے ایک بیان میں انہوں نے کہا کہ بین الاقوامی منڈی میں تیل کی قیمتوں میں کمی آ رہی ہے اور وزیراعظم شہباز شریف نے ہدایت دی ہے کہ اس کمی کا فائدہ فوری طور پر عوام تک منتقل کیا جائے۔ اس مقصد کے لیے حکومت نے ایک اعلیٰ سطحی کمیٹی تشکیل دی ہے جو پیٹرولیم مصنوعات کی قیمتوں کے تعین کے لیے شفاف ہفتہ وار فارمولہ مرتب کرے گی۔
شفاف ہفتہ وار فارمولہ
علی پرویز ملک کے مطابق شفاف فارمولے کے تحت عوام کو قیمتوں میں ردوبدل کی وجوہات سے مکمل آگاہی حاصل ہوگی اور مستقبل میں قیمتوں کے تعین کا عمل مزید شفاف بنایا جائے گا۔ انہوں نے کہا کہ اس فارمولے کو تمام متعلقہ اسٹیک ہولڈرز سے مشاورت کے بعد حتمی شکل دی جائے گی۔ حکومتی معاشی ٹیم، جس میں وزیرِ خزانہ بھی شامل ہیں، اس عمل کی نگرانی کر رہی ہے۔
توانائی کی سپلائی اور مستقبل کی حکمت عملی
وفاقی وزیر نے کہا کہ خطے میں کشیدگی کے باوجود حکومت نے ذمہ داری کے ساتھ ملک میں تیل کی سپلائی چین کو بغیر کسی بڑی رکاوٹ کے برقرار رکھا۔ انہوں نے اس سلسلے میں تعاون پر تمام شراکت داروں اور عوام کا شکریہ ادا کیا۔ وزیر خارجہ اسحاق ڈار کی قیادت میں سفارتی سطح پر بھی کوششیں جاری ہیں۔
انہوں نے مزید بتایا کہ موجودہ علاقائی صورتحال کے تناظر میں حکومت پاکستان اپنی توانائی سلامتی کی حکمت عملی کا بھی ازسرِ نو جائزہ لے رہی ہے اور آنے والے مہینوں میں ریاستی مفادات کے تحفظ اور توانائی کے محفوظ مستقبل کے لیے متعدد اقدامات متعارف کرائے جائیں گے۔ عالمی منڈیوں میں قیمتوں کے اتار چڑھاؤ پر گہری نظر رکھی جا رہی ہے، جس کی تفصیلات اکثر بین الاقوامی نشریاتی ادارے بھی جاری کرتے ہیں۔
