لبنانی مسلح افواج کے سربراہ کی جی ایچ کیو آمد، فیلڈ مارشل عاصم منیر سے اہم
راولپنڈی (دوست نیوز) — لبنانی مسلح افواج کے کمانڈر اِن چیف جنرل روڈولف ہائیکل نے منگل کے روز جنرل ہیڈکوارٹرز (جی ایچ کیو) راولپنڈی میں فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف اور چیف آف ڈیفنس فورسز سے ملاقات کی۔
آئی ایس پی آر کے مطابق جی ایچ کیو آمد پر معزز مہمان کو پاک فوج، پاک بحریہ اور پاک فضائیہ کے چاق و چوبند دستے نے گارڈ آف آنر پیش کیا۔
ملاقات کے دوران دونوں عسکری رہنماؤں نے باہمی دلچسپی کے امور، خطے کی بدلتی ہوئی سکیورٹی صورتحال، دفاعی تعاون اور دوطرفہ فوجی تعلقات کے فروغ کے امکانات پر تفصیلی تبادلہ خیال کیا۔ بات چیت میں دونوں ممالک کی مسلح افواج کے درمیان پیشہ ورانہ روابط، تربیتی تعاون اور ادارہ جاتی اشتراک کو مزید مضبوط بنانے پر خصوصی توجہ دی گئی۔
فیلڈ مارشل سید عاصم منیر نے اس موقع پر پاکستان اور لبنان کے درمیان دیرینہ، دوستانہ اور برادرانہ تعلقات کی اہمیت کو اجاگر کرتے ہوئے کہا کہ پاکستان آرمی لبنانی مسلح افواج کے ساتھ دفاعی تعاون کو مزید وسعت دینے کے لیے پُرعزم ہے۔
لبنانی مسلح افواج کے سربراہ جنرل روڈولف ہائیکل نے پاکستان کی مسلح افواج کی پیشہ ورانہ صلاحیتوں اور آپریشنل مہارت کو سراہتے ہوئے علاقائی امن و استحکام اور عالمی امن مشنز میں پاکستان کے کردار کو قابلِ تحسین قرار دیا۔
آئی ایس پی آر کے مطابق یہ دورہ دونوں ممالک کی افواج کے درمیان تعلقات کو مزید مضبوط بنانے اور فوجی سطح پر تعاون کے نئے مواقع پیدا کرنے کے مشترکہ عزم کا مظہر ہے۔ دفاعی ماہرین کے مطابق پاکستان اور لبنان کے درمیان عسکری روابط میں اضافہ نہ صرف دونوں ممالک کے دفاعی اداروں کے لیے مفید ثابت ہوگا بلکہ علاقائی امن اور استحکام کے فروغ میں بھی اہم کردار ادا کرے گا۔
