یورپی یونین کی اعلیٰ نمائندہ برائے خارجہ امور و سلامتی پالیسی/یورپی کمیشن کی نائب صدر یکم جون کو پاکستان کا سرکاری دورہ کریں گی،وزارت خارجہ

اسلام آباد۔31مئی (دوست نیوز):نائب وزیرِ اعظم و وزیرِ خارجہ سینیٹر محمد اسحاق ڈار کی دعوت پر یورپی یونین کی اعلیٰ نمائندہ برائے خارجہ امور و سلامتی پالیسی/یورپی کمیشن کی نائب صدر کاجا کالاس یکم جون ( کل)کو پاکستان کا سرکاری دورہ کریں گی۔

اتوار کو وزارت خارجہ سے جاری بیان کے مطابق دورے کے دوران نائب وزیرِ اعظم و وزیرِ خارجہ سینیٹر محمد اسحاق ڈار اور یورپی یونین کی اعلیٰ نمائندہ پاکستان-یورپی یونین سٹریٹجک ڈائیلاگ کے آٹھویں اجلاس کی مشترکہ صدارت کریں گے، یہ ڈائیلاگ دونوں فریقوں کے درمیان باضابطہ مذاکرات کا اعلیٰ ترین پلیٹ فارم ہے۔

یورپی یونین کی اعلیٰ نمائندہ کی وزیرِ اعظم محمد شہباز شریف اور صدر مملکت آصف علی زرداری سمیت اعلیٰ قیادت سے ملاقاتیں بھی متوقع ہیں۔پاکستان یورپی یونین کے ساتھ اپنے دیرینہ اور ہمہ جہتی تعلقات کو نہایت اہمیت دیتا ہے جو مشترکہ اقدار، مضبوط اقتصادی تعاون اور کثیرالجہتی نظام سے مشترکہ وابستگی پر مبنی ہیں۔یہ متوقع دورہ پاکستان اور یورپی یونین کے درمیان اعلیٰ سطحی سیاسی روابط کے تسلسل کا عکاس اور باہمی شراکت داری مزید مضبوط بنانے کے مشترکہ عزم کا مظہر ہے۔