پاکستان گرین موبیلیٹی مشن کے تحت نوجوانوں کی شمولیت اور پائیدار ٹرانسپورٹ کے لیے اہم پیش رفت
اسلام آباد (دوست نیوز): وزیراعظم یوتھ پروگرام اور پروموٹنگ نیشنل کوہیژن کے درمیان پاکستان گرین موبیلیٹی مشن کے تحت نوجوانوں کی ترقی، پائیدار اقدامات اور قومی شمولیت کے فروغ کے لیے لیٹر آف انٹینٹ پر دستخط کیے گئے ہیں۔
وزیراعظم آفس میں ہونے والے اجلاس میں اس اشتراک کا مشاہدہ چیئرمین وزیراعظم یوتھ پروگرام رانا مشہود احمد خاں نے کیا۔ اجلاس میں پروموٹنگ نیشنل کوہیژن کی چیف ایگزیکٹو آفیسر میشا مظہر، ادارے کے ٹیکنیکل ایڈوائزری گروپ، بورڈ اراکین اور وزیراعظم یوتھ پروگرام کی ٹیم نے شرکت کی۔
جاری بیان کے مطابق پاکستان گرین موبیلیٹی مشن کے تحت دونوں ادارے گرین اور پائیدار ٹرانسپورٹ کے فروغ کے لیے مکالمے، شراکت داری، جدت اور عوامی آگاہی کے اقدامات کو آگے بڑھائیں گے۔ اس تعاون کا مقصد نوجوانوں کو ماحولیاتی شعور، اختراع اور قومی ترقی کے عمل میں زیادہ موثر کردار دینا ہے۔
اجلاس میں فیصلہ کیا گیا کہ اسلام آباد میں گرین موبیلیٹی کانفرنس اور ای وی ایکسپو منعقد کی جائے گی۔ یہ ایونٹ پالیسی سازوں، صنعت، تعلیمی اداروں، ترقیاتی شراکت داروں، نوجوانوں اور جدت کاروں کے لیے ایک قومی پلیٹ فارم فراہم کرے گا تاکہ گرین موبیلیٹی کے شعبے میں تعاون اور نئے مواقع کو فروغ مل سکے۔
اس اشتراک کے تحت نیشنل یوتھ کونسل، نیشنل والنٹیئر کور اور گرین یوتھ موومنٹ کلبز سمیت مختلف پلیٹ فارمز کے ذریعے نوجوانوں کی شمولیت کو بھی وسعت دی جائے گی۔ دونوں اداروں نے نوجوانوں کے لیے قیادت، کاروباری مواقع، رضاکارانہ سرگرمیوں اور ماحولیاتی اقدامات میں کردار بڑھانے کے عزم کا اعادہ کیا۔
نمائندگان نے اس بات پر زور دیا کہ نوجوان پاکستان کے پائیدار، مضبوط اور خوشحال مستقبل کی تعمیر میں کلیدی کردار ادا کر سکتے ہیں۔ یہ تعاون پالیسی مکالمے، تحقیق، پائیدار ترقی اور قومی یکجہتی کے لیے مستقبل میں باہمی تعاون کی بنیاد فراہم کرے گا۔
