جی ایچ کیو میں فوجی اعزازات کی تقریب، شہدا کے اہل خانہ اور غازیوں کو خراج تحسین
راولپنڈی (دوست نیوز): جنرل ہیڈ کوارٹرز راولپنڈی میں پاک فوج کے افسران اور جوانوں کو عسکری اعزازات دینے کی تقریب منعقد ہوئی، جس میں فیلڈ مارشل سید عاصم منیر، نشانِ امتیاز ملٹری، ہلالِ جرات، چیف آف آرمی اسٹاف و چیف آف ڈیفنس فورسز نے بطور مہمانِ خصوصی شرکت کی۔
آئی ایس پی آر کے مطابق تقریب میں آپریشنز میں غیر معمولی بہادری اور قومی خدمات کے اعتراف میں شہدا کے اہل خانہ، افسران اور جوانوں کو اعزازات دیے گئے۔ عطا کیے گئے اعزازات میں 50 ستارہ امتیاز ملٹری اور 12 تمغہ بسالت شامل تھے، جبکہ بعد از شہادت دیے گئے میڈلز شہدا کے اہل خانہ نے وقار کے ساتھ وصول کیے۔
فیلڈ مارشل سید عاصم منیر نے شہدا اور غازیوں کو خراج تحسین پیش کرتے ہوئے کہا کہ شہدا اور غازی قوم کا پائیدار فخر ہیں، ان کی عزت اور قربانی ہر پاکستانی کے لیے مقدس امانت ہے۔ انہوں نے کہا کہ وطن عزیز کا امن و تحفظ انہی عظیم قربانیوں اور فرض شناسی کا نتیجہ ہے۔
انہوں نے شہدا کے خاندانوں کے صبر، وقار اور ثابت قدمی کو بھی سراہا اور کہا کہ قوم ان خاندانوں کی قربانیوں کو ہمیشہ احترام کی نگاہ سے دیکھتی ہے۔ تقریب میں شہدا کے اہل خانہ کی موجودگی کو قومی عزم اور قربانی کی روشن علامت قرار دیا گیا۔
فیلڈ مارشل نے پاک فوج اور قانون نافذ کرنے والے اداروں کی آپریشنل تیاری اور دہشت گردی کے خلاف مسلسل کوششوں کو بھی سراہا۔ انہوں نے اس عزم کا اعادہ کیا کہ دہشت گردی کے خلاف جنگ مکمل قومی عزم کے ساتھ جاری رہے گی تاکہ ملک بھر میں دیرپا امن اور استحکام یقینی بنایا جا سکے۔
تصاویر
