پاکستان نے متحدہ عرب امارات کے مالیاتی ڈیپازٹس سے متعلق گمراہ کن تبصرے مسترد کرتے ہوئے انہیں بے بنیاد اور حقیقت کے منافی قرار دیا ہے

	اسلام آباد۔4اپریل  (اے پی پی):پاکستان نے متحدہ عرب امارات کے مالیاتی ڈیپازٹس سے متعلق گمراہ کن تبصرے مسترد کرتے ہوئے انہیں  بے بنیاد اور حقیقت کے منافی قرار دیا ہے۔ ہفتہ کو ایک بیان میں ترجمان دفتر خارجہ نے کہا کہ سٹیٹ بینک میں رکھے گئے ڈیپازٹس دو طرفہ تجارتی معاہدوں کا حصہ تھے،یو اے ای کے ڈیپازٹس پاکستان کے معاشی استحکام کے لیے مضبوط حمایت کا مظہر ہیں۔انہوں نے کہا کہ حکومتِ پاکستان طے شدہ شرائط کے مطابق مدت پوری ہونے پر ڈیپازٹس واپس کر رہی ہے،ڈیپازٹس کی واپسی ایک معمول کی مالیاتی کارروائی ہے اسے غلط رنگ دینا گمراہ کن ہے۔ ترجمان  نے کہا کہ پاکستان اور یو اے ای کے دیرینہ اور برادرانہ تعلقات  ہیں، تجارت، سرمایہ کاری اور دفاع سمیت مختلف شعبوں میں اسٹریٹجک تعاون جاری ہے،پاکستانی عوام پاک-امارات دوستی کے قیام میں شیخ زاید بن سلطان النہیان کے کردار کو قدر کی نگاہ سے دیکھتے ہیں۔ترجمان نے کہا کہ پاکستان، یو اے ای کے ساتھ مضبوط تعلقات کو مزید فروغ دینے کے عزم پر قائم ہے۔